La mont di Cjargne, une passion cence etât

A 70 agns, la storie di Adriano Sbrizzai
e met dongje passion pal ambient,
sport, amicizie e solidarietât

Cui che al cognòs lis sezions cjargnelis dal CAI, dal sigûr al à podût cognossi l’alpinist paularin Adriano Sbrizzai e lis sôs impresis in mont. Adriano al è nassût cu la passion de mont: di fat, bielzà di piçul – sedi cuant che al leve a cjatâ il barbe tes malghis che, dopo, cui cusins – al leve a rimpinâsi pai crets. “O soi simpri stât un frut vivarôs – al conte –  e no mi fermave nissun. Mi impensi un particolâr di cuant che o jeri sù in mont a fâ fen cui miei gjenitôrs, o vevi 8 agns. Jo o levi sù fin insom di un peç che al jere alt cirche 30 metris. Rivât insom, o tacavi a niçulâmi. Mê mari mi diseve di smontâ jù ma jo no le scoltavi. Dopo o soi cressût, e a 15 agns o ai fat lis valîs par lâ a lavorâ tal forest”.
◆ “O ai simpri fat il muredôr – al dîs – e cuant che o soi lât a vore a Cortine o ai cognossût int impuartante tal mont dal alpinisim, e o ai scomençât a praticâ assensions e scjaladis. Dopo o ai cognossût chê che e je deventade la mê femine, mi soi maridât, o ai vût doi fîs e o ai scugnût meti in bande cheste mê passion. Ma o cjalavi lis monts e o sintivi che o sarès tornât a cirîlis. Cussì al è sucedût, dopo 25 agns, cuant che o sei lât in pension.
◆ Une dì, inte palestre di cret a Dieç o ai cognossût Sergio Liessi e di in chê volte o vin tacât a lâ ator pes monts insiemi. In chel moment, jo o sintivi la bisugne di ripeti lis viis, no di lâ a vierzint di gnovis. O ai fat 250 ripetizions, ma une dì, lant cun Sergio, cuant che o ai viert une vie o soi restât incantesemât. Dopo, purtrop, lui al è muart par une malatie e jo o sei partît in cuarte ancje par lui. O soi rivât a vierzi 200 viis tes monts cjargnelis (in particolâr Zermule e Crete Serniate) e tes Dolomitis di là de Plâf. O soi stât za premiât pal gno impegn e mi sint content parcè che nol è facil par un alpinist rivâ a fâ gnovis scuviertis. E je propit une sodisfazion!”.
◆ Programs pal doman a ‘nd è tancj par Adriano che, a 70 agns, al dîs: “Alpiniscj innomenâts mi àn dit che se no mi maridavi o varès vude une cariere di alpinist. Ma jo o soi content de vite che o ai fat. Cuant che o partìs di cjase a buinore, o saludi la mê femine e i dîs che o voi ma che no sai se o torni: la pôre e je simpri, ma mi jude a tignîmi plui orientât su ce che o ai di fâ”.
◆ Adriano al è simpri in ativitât: tal periodi estîf al va a rimpinâ, di Setembar fin ae prime nêf al va a sondâ il teren, a esplorâ, cence contâ che se nol va in mont al va in biciclete par tignîsi in alenament. Ogni tant al puarte in mont un grup di personis in cure tal Centri di Salût Mentâl di Glemone. Ancje achì al à lis sôs sodisfazions: “Sul imprin, ducj a jerin seris e no fevelavin mai. Dopo un pocjis di jessudis, a àn tacât a cjacarâ, a fâ domandis, a scherçâ. La mont e il cjaminâ a fasin ben ae salût di ducj”. ❚