Sfuei Mensîl Furlan Indipendent
Archivi de Patrie

Zenvrâr. Il mês dal Unpardoi

Bete di Spere

Il mês di Zenvrâr nol esist, ma o ai di fâ fente di sì parcè che la Patrie e jes cuntun numar dome pai doi mês di Zenâr e Fevrâr. A Zenvrâr a finissin lis fiestis di Nadâl e al scomence il carnevâl: par fâ fente che al sedi un mês sôl, o podês mangjâ il paneton cu lis fritulis tal puest dai candîts. Zenvrâr chest an al è bisest: chest al vûl dî che o varês ducj une dì di plui par no scomençâ la diete.

I sants dal mês

Ai 17 di Zenâr si festeze Sant Antoni Abât, rapresentât simpri cuntun purcit, o ben – in cualchi glesie furlane – diretementri cuntun muset.

Ai 20 di Zenâr si pree Sant Bastian. Se a cualchidun no i va ben, al pues preâ ancje il sô rivâl, Sant Bastian Contrari.

Ai 14 di Fevrâr al è Sant Valantin, protetôr dai rosarûi, dai cjocolatârs, dai oresins e dai ristoradôrs.

Ai 26 di Fevrâr e je la dì de Cinise: a cui che al va a messe, i poin sul cjâf un pocje di chê vignude fûr cul brusâ i ramaçs di ulîf dal an passât o, se propit no ‘nd è avonde, chê dal ultin pignarûl.

I proverbis dal mês

A Nadâl un pît di gjal, al Prin dal an un pît di cjan, ae Pifanie un pît di strie. (Proverbi inventât di un cjaliâr che al veve une clientele no propit a plomp)

A Sante Polonie il fret al va in Slavonie. (E dopo al torne indaûr cul plen di benzine e cuntune steche di spagnolets)

Zenvrâr te storie

Ai 27 di Fevrâr dal 1511, tal famôs riviel de Joibe Grasse, il popul furlan al tire sù une rivoluzion cuintri dai nobii che, rivâts ae fin dal carnevâl, no ur vevin dât nancje un crostul o une fritule. Cui agns, si è pierdude un pôc la memorie di chest avigniment, massime par colpe de mode dal “politically correct”: duncje, vuê si à miôr clamâ la “Crudêl Joibe Grasse” la “Crudêl Joibe fûr di forme”.

Personaçs nassûts in Zenvrâr

Jacum Unpardoi, l’inventôr dal aperitîf Marcello D’Olivo, cognossût par vê progjetade la strade di Lignan Pinede. Pôcs a san che in chel sfuei, D’Olivo al veve dome fat un dissen par visâsi di lâ ae fieste dai cais di Turide, ma cuant che ducj i àn dit che e jere une idee gjeniâl, il D’Olivo nol à vût cûr di disvelâ la veretât. Il so dissen origjinâl par Lignan Pinede, cu lis stradis a forme di cjarsons, al è lât pierdût.

Apontaments

Ai 25 di Zenâr, tal palaç dal sport “Jacum dai zeis”, grant Torneu regjonâl di more. A saran premiâts i prins trrrr vincidôrs.

Ai 11 di Fevrâr, pe Zornade regjonâl dal cjossul, fasêt ce che o vês voie. ❚

 

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +