ATUALITÂT – Conciert par Zorç che al finìs i 60

E je stade une serade in onôr di Zorç Ferigo e in favôr de musiche dai Povolâr Ensamble, chê di domenie ai nûf di Avost, li dai Colonos di Vilecjaze di Listize. Une fieste organizade de Associazion Culturâl Giorgio Ferigo, cu la partecipazion di Giuliana Venturoso e di Toni Zogno (sunadôr dai Povolâr) par fiestezâ chel che al sarès stât il sessantesim complean di Zorç. L’event al à riclamât ae memorie ancje une altre fieste, chê volude pai siei cuarantecinc agns, simpri ai Colonos tal 1994: une sorte di aniversari-complean che e à comovût tancj di lôr. Des siet sore sere, si son dâts dongje sul palc vot grups par sunâ cjançons dal repertori dai Povolâr, rielaboradis lant daûr ognidun dal propri jessi, secont la personâl vision da musiche. Arbe Garbe (Jerbata), Bakan (Romancillo da l’amôr galup), ¿Cuinon? (Lienda da la contessa Priola), DJ Tubet (Dal pruc), La Stravinte (Da chest paîs forest), Morpheus & Mattia del Moro (Ventura di Mille-Mieli), The Charlestones (Un sabida di sera), Vanilla Resident (Un soldatin), te cort dai Colons a àn riclamât ae memorie de int un piçul tocut di storie de musiche furlane, mostrant a ducj che in fin dai conts il ricuart des lidrîs nol è dismenteât, nancje tra chei zovins che a vivin ancjemò «tal timp dai sclopons». Il lavôr fat dai Povolâr Ensamble, duncje, nol va pierdût e par chei sunadôrs che prime no vevin mai scoltade la lôr musiche, ve ca la ocasion juste par imparâle e par gjoldile. Cussì, e je stade une biele maravee scoltâ «Un sabida di sera» come che le sunaressin i Artic Monkeys o ancjemò «Un soldatin», tradusût tal lengaç dal grunge. Mancul biel al sarès stât scoltâ replichis sonoris, magari precisis ma forsit pôc sinceris, e duncje la serade si è trasformade intune sorte di fieste pe opare di Zorç e di ducj i components dal Ensamble, che a àn savût tradusi in musiche peraulis e pensîrs cjargnei. In plui, la serade e je stade un biel moment di incuintri tra i grups sparniçâts pe regjon, che par solit a sunin e che magari no rivin mai a scoltâsi dal vîf fra di lôr. La serade si è sierade cuntune cjantose corâl di ducj i grups di «Il timp das radîs», par butâ vie la miserie dal timp che al passe e par tignî di cont la voie di fâ fieste e di stâ contents.
Une seconde serade dedicade a Ferigo, si è tignude a Comelians ai vincj di Avost te sale L’Alpina, des cinc sore sere, là che dodis fra grups e sunadôrs a àn proponût altris cjantis dal repertori dai Povolâr Ensamble.
Renzo Brollo