E je finide, dopo pôc plui di un an, la colaborazion esterne tra la coalizion dal prin guvier sloven di minorance, formât dai partîts LMŠ, SD, SMC, SAB e DeSUS, e il partît Levica (La Çampe).
Il prin acuardi, che dopo e al à dât vite al decim tierç esecutîf sloven vuidât di Marjan Šarec, al jere stât definît intal Istât dal 2018. Dopo un lunc periodi di tensions Levica, la formazion politiche vuidade di Luka Mesec, e à decidût di anulâ l’acuardi, dant la colpe al esecutîf, acusât di no vê rispietât i tiermins e di jessi lât simpri plui daûr di une politiche di centridiestre.
In Sierade La Çampe e veve dadis al guvier trê cundizions par garantî la sô poie ae manovre finanziarie pal prossim bieni e lâ indevant inte colaborazion. La gote che e à fat stranfâ il cit e je stade la poie mancjade al dissen di leç de Çampe sul trasferiment de assicurazion sanitarie integrative (par cumò paiade aes cjasis di assicurazion) ta chê obligatorie. Ancje la coalizion di guvier e je convinte che si vedi di cancelâ la assicurazion sanitarie integrative includintle ta chê obligatorie, ma cundut des provis no si à rivât a un test condividût ad in plen, massime par chel che al inten lis cuviertiduris finanziariis necessariis e il calcul des cuotis contributivis.
Il guvier, che al varès volût lâ indenant cun plui cautele, ancje inte otiche di une riforme sanitarie complessive, al à ritignût che la propueste de Çampe no fos sostignibile dal pont di viste finanziari e il partît dal prin ministri al à prontade une cuintripropueste presentant, vie pal esam in comission, diviers emendaments. Daspò de poie mancjade al propri test, dut câs, la Çampe e à fat subite savê di jessi passade ae oposizion. Il prin ministri Šarec al à marcât che il so guvier al varès volût continuâ a colaborâ, ma che al riten sbaliade la politiche dai ultimatums.
Reazions di disapont, cualchidune une vore critiche, a son rivadis ancje dai esponents dai partîts di guvier che cumò a puedin contâ in parlament dome su 43 vôts (sui 46 che a coventin pe maiorance assolude). La coalizion e cirarà duncje la poie pes misuris singulis che e larà a proponi ancje di chei altris partîts parlamentârs, che e je une carateristiche dai guviers di minorance, cemût che al à ricuardât il prin ministri. Šarec dut câs al à dit di jessi convint di podê fâ afidament su la poie sedi de Çampe che di chei altris deputâts, tal câs che a ritignedin che lis misuris che a vignaran proponudis a sedin buinis pal futûr de Slovenie. Pal moment, però, no vignaran fats altris acuardis di colaborazion tant che chel cu la Çampe, che cumò nol esist plui. ❚
Tjaša Gruden
