Fat bon dome cui vôts dal centridiestre
Ai 30 di Otubar al è stât fat bon il dissen di leç 68 che al inzorne la normative pe tutele e promozion des minorancis linguistichis furlane, slovene e todescje dal Friûl-Vignesie Julie – che la lôr presince e je ae fonde de specialitât de Regjon -, passât cui 23 sì de maiorance di centridiestre, che e à votât unide. 16 i vôts contraris des oposizions e 4 lis astensions.
Une leç che e discrimine e e divît, tant che o spieghìn tal editoriâl in prime pagjine, che e dinee al furlan la dignitât di lenghe e il dirit a une politiche linguistiche in linie cui princips europeans, imbastide cence coinvolzi cui che al lavore pe promozion de lenghe furlane, se no par sintî un parê al ultin minût, ancje chel no calcolât. Une leç fie di un assessôr triestin, Pierpaolo Roberti, che propit des pagjinis dal nestri gjornâl, tal Jugn dal an passât, intervistât daspò la notizie de sô deleghe aes minorancis linguistichis, al veve volût sigurâ i ambients furlaniscj su la condivision des domandis di tutele, legjitimis, de bande des diferentis identitâts regjonâls. «Su chest front – nus veve vût dit -, o sarai il triestin plui furlan che o vedis mai cognossût».
Pecjât che cumò i furlans si cjatin – neri su blanc – cuntune leç che ju umilie e che e umilie il furlan. Che dal 2021 e vierzarà al mecanisim dai bants tant che imprest operatîf des associazions impegnadis pe promozion e difusion de lenghe furlane (o almancul di une part – daûr di criteris pôc clârs -, comprendude la Clape di Culture “Patrie dal Friûl” che e da fûr il nestri gjornâl), daspò jessi passadis pe amission intune liste di pueste. Associazions che a saran, duncje, condanadis di fat ae inciertece e ae precarietât, butant vie esperiencis, competencis e professionalitâts maduridis in agnorums di ativitât a pro de lenghe. Velu ca un altri pas te direzion di chê “muart cuiete” dal furlan che l’assessôr, ae “Patrie”, al veve dit di volê fâi cuintri. E ducj i conseîrs regjonâi de maiorance che a àn zurât par furlan al moment dal insediament in Consei, parcè no àno viert il bec invezit di pleâsi – intune regjon autonome! – ai ordins dai partîts centrâi?! Al veve reson pre Checo Placerean, che al diseve: «Cuant che un popul nol è bon di rispietâsi, di rispietâ la sô lenghe e la sô culture, al è un popul adat par fâ il sotan di chei altris».
Pe croniche – e par tignînt memorie -, a àn votât a pro dal ddl 68 i conseîrs Diego Bernardis, Mauro Bordin, Luca Boschetti, Alberto Budai, Giuseppe Ghersinich, Antonio Lippolis, Stefano Mazzolini, Elia Miani, Ivo Moras, Simone Polesello, Alfonso Singh, Danilo Slokar, Maddalena Spagnolo, Lorenzo Tosolini e Stefano Turchet, par Lega Salvini; Franco Mattiussi e Mara Piccin, par Forza Italia; Mauro Di Bert, Edy Morandini, Giuseppe Sibau e Emanuele Zanon, par Progetto FVG/Autonomia Responsabile; Alessandro Basso e Leonardo Barberio, par Fratelli d’Italia.
16 i vôts contraris, ven a stâi chei di Sergio Bolzonello, Nicola Conficoni, Roberto Cosolini, Chiara Da Giau, Igor Gabrovec, Franco Iacop, Enzo Marsilio, Diego Moretti, Francesco Russo, Mariagrazia Santoro e Cristiano Shaurli, pal Partito Democratico; Giampaolo Bidoli e Massimo Moretuzzo, pal Pat pe Autonomie; Tiziano Centis e Simona Liguori, pai Cittadini; Furio Honsell, pal Gruppo Misto.
Si son astignûts i 4 conseîrs dal Movimento 5 Stelle: Mauro Capozzella, Ilaria Dal Zovo, Cristian Sergo e Andrea Ussai.
Infin, simpri par furnî une informazion plui trasparinte pussibile, o zontìn che al è stât une vore impiât il dibatit in Aule suntun emendament – refudât dal centridiestre – li che lis oposizions a proponevin di finanziâ a cjapitul, tant che altris orghins di informazion in lenghe furlane, “La Patrie dal Friûl”, e che invezit la maiorance e à decidût di meti a bant. Duncje, il “colp di sene”: il sucessîf ordin dal dì a sostegn da “La Patrie dal Friûl”, presentât dal Pat pe Autonomie, che Roberti al veve dât parê contrari, al è stât fat bon in gracie dai 4 vôts di Progetto FVG che a àn metût sot – pe prime volte te legjislature – il centridiestre. ❚
Erika Adami
