O ai il privileç di conservâ cualchi letare e cualchi dediche che il professôr al à volût scrivimi.

La scriture - ancje se jo no soi un grafolic - par gno cont e rapresente il caratar e il spirt dal professôr. Une caligrafie clare e minude, un stîl che al riflet la sô grande cognossince dal mont e che, tal stes timp, al somee cuasi che a ‘nt cjapi lis distancis, intune sorte di pessimisim viers di une pussibile soluzion dai problemis. D’Aronco al è un om che al fâs un ûs preziôs de critiche, no dome cuant che al tache l’aversari di turni ma ancje cuant che al studie, al analize lis contradizions in cjamp amì. I siei intervents - e mi riferìs ae cuistion furlane - a nassin de osservazion lucide des contradizions, de propueste dal cemût risolvilis ma, tal stes timp, dai limits che a saltaran fûr intal frontâlis. Chi al nas il cruzi - puartât dispès a nivel di dolôr etic e politic - tra il so grant amôr pal Friûl e lis debilecis che a caraterizin invezit il popul. Dispès al ven a flôr il pinsîr che une cundizion di sumission storiche e esistenziâl e aflizi la nestre int, tant che un tumôr presint fin de nassite, destinât a palesâsi intal moment des sieltis decisivis, o ben cuant che al rive il moment dal riviel e dal distac definitîf dal stât di robis presintis a chel futûr.

Al professôr i va ricognossût il merit di no vê mai cedût - cundut di cheste vision di “sotanisim” che e pâr jessi simpri presinte tai siei intervents - ae tentazion facile di molâ la bataie autonomiste che lu viôt protagonist fin di cuant che al è tacât il Moviment. Anzit, cul passâ dai agns al somee cuasi che il “pessimisim” al sedi coventât di stimul par impegns gnûfs.

Parcè che chest al è il rûl dal inteletuâl leât ae sô tiere: jessi la sô cussience critiche fin ae fin.

Cun chê finece, inteligjence e fuarce che a fasin ancjemò di D’Aronco un aversari temibil e imbatibil pai nemîs dal Friûl. ❚

Dree Valcic