Giovanni Minut,
Rimis furlanis,
par cure di Ferruccio Tassin,
Societât Filologjiche Furlane,
Pasian di Prât, 2017
“Furlans, / sôi cà, no cu le ‘sagre di Bolzan’ o / cu li “Lejendis furlanis”, ma cun quatri / rimis scletis perzè che le Muse mi / à ciapât pa orelis e jo ài scugnût menâ / le man zemût che je mi zisicave. / Ciatarês quatri peraulis butadis jù / a le furlane scritis par noatris che / sîn sanzirs e senze fotis”.
Cussì Zuan Minut al introduseve, intal 1921, la sô racuelte di vincjedôs composizions poetichis. Al jere un sindicalist, une vore impegnât intes lotis dai contadins intai prins agns Vincj dal secul passât, inte Basse furlane (Minut al jere di Visc). E dongje di chest impegn sociâl e politic (prime socialist e po comunist), al à vût cheste ispirazion poetiche. Poesie, la sô, che e rapresente une roture cu la tradizion di Çorut, par frontâ cence pôre i problemis de puare int che e veve di tribulâ une vore par meti alc sot dai dincj (Misèrie infame). La sô e je une denunzie penze cuintri dal egoisim dai siôrs (Al va a distraisile, Titui di misèrie), cuintri de vuere (Militarisc’ a ufe, Umanitât). Ma al à ancje moments di lirisim sempliç e delicât (Cialant la lune) e une vene di sarcasmi (Lùzie confusionarie, Le purzite di Catine).
Ferruccio Tassin al cure cumò, cu la solite sgrimie, cheste edizion meritorie publicade de Societât Filologjiche Furlane, daspò che il poete di Visc al jere lât in dismentie. Ancje par vie che, intal 1923, Minut al emigrà prime in Argjentine e po in Uruguay e nol fasè plui ni ativitât politiche, ni poesie (si ocupà di industrie casearie, de lavorazion dal lat). Chest librut di un centenâr di pagjinis i fâs justizie e i da il puest che i spiete a un autôr che, dut câs, al à vût i siei merits intal rinovâ la poesie furlane, ancje se al sarès sbaliât esaltâlu fûr di misure (sicu che al fâs Domenico Ferla, a pagjine 43, che al rive a dî che lis 22 poesiis di Minut a valin dut ce che al à scrit Pasolini!!!).
Il librut al è insiorât di une introduzion di Dario Mattiussi, di un profîl biografic di Federico Snaidero, di une desene di fotografiis e di une bibliografie meticolose e une vore siore. Un strument complet par cognossi la opare di Minut. ❚
Laurin Zuan Nardin
