Laureât in Siencis politichis cuntune tesi in Sociologjie des Relazions etnichis inte Universitât di Triest, diplomât ae “Scuola Ipotesi Cinema” dal regjist Ermanno Olmi, Massimo Garlatti-Costa si trasferìs in Grande Bretagne par studiâ ae “Northern Media School” di Sheffield, dulà che al cjape il “Master of Arts” in fiction directing & screenwriting.
Al lavore in Grande Bretagne come regjist e senegjatôr par dîs agns in documentaris, fiction, video musicâi e publicitât, colaborant sedi cun cjasis di produzion indipendentis sedi lavorant pe BBC e par Channel4.
I siei lavôrs a son stâts premiâts e selezionâts di festivals internazionâi e mandâts in onde di televisions sedi in Italie che tal forest.
Dopo un periodi dulà che al lavore come regjist publicitari a Milan, al torne in Friûl e intal 2004 al fonde la cjase di produzion Raja Films e cun chê al à produsût une vore di documentaris come: Missus, Isonzofront, UZC, Ufficio di Confine, Quando la terra chiama, Uomini di Terra, Nuovi Italiani, Friûl Viaç te Storie, Elio Bartolini e lis seriis di documentaris pe RAI dal Friûl-Vignesie Julie SunsAtor e Int in Curt. ❚

E.A.