Sfuei Mensîl Furlan Indipendent
Archivi de Patrie

INCHIESTE. “Di là de aghe” il Friûl al torne a jessi un valôr zontât

............

Lis disfidis dal avignî a imponin
une unitât di intindiments in chest teritori omogjeni

Friûl model Trentin-Sud Tirôl cun dôs Provinciis autonomis che a corispuindin al Friûl e al teritori di Triest? Di decenis un “sium” dai autonomiscj furlans, un model organizatîf che in agns plui resints al è stât rilançât de iniziative di referendum propositîf metût fûr dal sindic di Rivignan Teôr, Mario Anzil. Si puedial pardabon cori cheste strade, viodût che la Zonte regjonâl e sta par mandâ fûr la sô propueste di riforme istituzionâl par rimedeâ al brut pastiel

(ma al sarès miôr clamâle tragjedie…) des Unions teritoriâls intercomunâls?

“La Patrie dal Friûl” e je lade a scandaiâ i umôrs intal Friûl Ocidentâl, un teren fondamentâl par verificâ la tignude di cualsisedi idee di asset istituzionâl dal teritori furlan. Dividude cuntun slambri di Udin intal 1968 (par colpe in buine part de classe politiche di chê volte, vuarbe e acentradore), la opinion publiche de ex provincie di Pordenon e je di simpri un banc di prove impegnatîf par ogni idee di rilanç dal autonomisim furlan. Situazion che e je lade ancjemò di plui in piês daspò de abolizion de Provincie eletive, vivude dal teritori tant che une pierdite fuarte di identitât e di podê, pardabon un impuariment dal teritori.

In cheste situazion li che il discomut si tocje, si puedial pensâ di proponi la idee di une istituzion che e rapresenti il Friûl unît? Lu vin domandât ai aministradôrs locâi (il sindic di Vît, Gerometta, e chel di Sacîl, Spagnol), a un osservadôr politic fin come l’ex assessôr regjonâl ae Culture, Elio De Anna, e ancje ex president de Provincie di Pordenon (promotôr, cul so omolic di Udin, Marzio Strassoldo, dal progjet di Assemblee des Provinciis dal Friûl) e a un cognossidôr profont dal mont economic dal Friûl Ocidentâl, Alberto Marchiori (za president regjonâl di Confcumierç e vicepresident de Cjamare di cumierç di Pordenon).

E ven fûr une linie comune: tornâ a proponi la vecje Provincie di Pordenon al è un passaç politic che no si pues evitâ par une opinion publiche che si sint defraudade des riformis dai ultins agns, ma si fâs strade cun fuarce, dal bas, la cussience che tornâ a resonâ in mût strategjic sul disvilup economic intune dimension di Friûl unît, par frenâ l’espansionisim triestin, al è un element fondamentâl pal avignî. E a chest rivuart tra il Tiliment e la Livence si spietin segnâi e iniziativis impuartantis di bande di Udin. ❚

Roberto Pensa

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +