Sieradure ai 8 di Setembar a Zui
cun “Aquileia Mater”,
un progjet di Glauco Venier
E je la edizion numar 28, a son in programe la bielece di trentecinc concierts, tra il 21 di Lui e il 8 di Setembar, in cuasi ducj i comuns de Cjargne, cjapant dentri ancje la Valcjanâl e il Cjanâl dal Fier. Musiche di alt nivel, tra classiche, jazz e tradizions dal mont, cun artiscj internazionâi e cetantis formazions furlanis, cuntun voli e, miôr, lis orelis atentis ai zovins dal nestri teritori. E je Carniarmonie – la rassegne curade dal diretôr artistic e clarinetist di fame Claudio Mansutti de Fondazion Luigi Bon – che di diviersis edizions e fâs il dut esaurît in pratiche in ducj i apontaments, interessant la popolazion locâl e simpri plui presincis dal forest. La formule magjiche e je chê di proponi musiche di grande cualitât intai lûcs plui biei des Alps Cjargnelis, cjamâts di storie e di tradizions. Glesiis, plêfs, museus intal binomi visitis vuidadis plui concierts, valorizazion dai orghins liturgjics e des bielecis dal paisaç, intal massim rispiet de nature, sostignint ancje lis realtâts locâls in ambit culturâl e enogastronomic, par une intese virtuose uniche tal so gjenar.
Il debut al è pai 21 di Lui, aes 20.45, inte maraveose plêf di Sante Marie Anunziade di Castoie di Soclêf, cuant che la Orchestre Zovanîl Alpine HEurOpen – nassude in graciis dal progjet european “La Vie de Musiche/ Straße der Musik” che al met insiemi talents musicâi tra i 16 e i 28 agns dal Friûl e de Austrie, cu la partecipazion dal ancje lui zovin e za ben cognossût violinist udinês Christian Sebastianutto, sot de direzion de bachete esperte di Filippo Maria Bressan – e darà il “la” ae manifestazion cun musichis par grant organic di Beethoven e Mendelssohn.
La rassegne si sierarà ai 8 di Setembar inte aree archeologjiche dal Forum roman di Zui cun “Aquileia Mater”, un progjet scrit e curât dal compositôr di Grediscje di Sedean Glauco Venier e cu la partecipazion di artiscj di grande nomee, par rivisitazions contemporaniis de tradizion musicâl di Aquilee. Il rest al è dut di scuvierzi, e dutis lis informazions cul calendari, sui ospits e sui programs musicâi, si cjatin sul sît www.carniarmonie.it ❚
par cure de redazion
