Une composizion
par dâi anime e cûr ae Cjargne
Si invie cun chest numar une rubriche musicâl par investigâ i sunôrs, lis peraulis e lis melodiis plui preseadis, amadis, rapresentativis de Patrie dal Friûl. Lant propit a cirî, studiant, domandant, coinvolzint esperts, apassionâts, cultôrs e diretôrs di bandis, corâls, cjantôrs, musiciscj. Cussì di podê sondâ cuale che e je in dì di vuê, o di tradizion, la cjançon, la composizion plui sintude e cjantade di ogni determinade comunitât dal Friûl, sedi orientâl che ocidentâl, de mont ae plane ae marine. Un compendi di furlanetât musicâl cun ogni mês une cjante, une composizion, gnove o vecje nol impuarte, ma che e sedi soredut sintude e mantignude di ogni clape de Patrie dal Friûl.
Un viaç apassionât che al tache de tiere di Cjargne cuntune composizion no propit storiche, ma anzit pluitost resinte, componude tal 2001 e presentade la prime volte in chel stes an pe Fieste di Sant Martin, patron di Tumieç, tal Domo, cun tant di orchestre e ben trê corâls: di Paulâr, Tumieç e Paluce. L’autôr de musiche e dal test al è il cjâr mestri e compositôr Giovanni Canciani, grandissime figure de culture in Friûl, che al è mancjât ai 19 di Dicembar dal an passât. Come che lui stes al à contât, chest imni de Cjargne, intitulât “Carnorum Regio”, al à scrit di butade e la struture, sore di un implant armonic par côr a cuatri vôs, une grande orchestre e soliscj, e ricalche la ande des melodiis popolârs, duncje di intuizion imediade e cetant facile di memorizâ.
Une cjantose che e à subit cjapât tal profont il cûr e lis orelis de int, in virtût de sô grandece costrutive, di impat sigûr, e tal stes timp par vie de cualitât rare di rivâ a jessi subit familiâr, e duncje che ducj le puedin cjantâ. L’imni al cjape il titul di un scrit di Plinio il Vecjo che, inte “Naturalis Historia”, al conte de Carnorum Regio, la regjon dai cjargnei, che un altri tant che Tito Livio al dîs bagnade de aghe, e duncje si rive a considerâ che la colonie di Aquilee e jere stade derivade o ben fondade su pe Carnorum Regio, che inte protostorie e cjapave dentri dut il Friûl.
Il mestri Canciani plui voltis al à declarât – ancje a mi che o scrîf – che cheste composizion e à la intenzion di dâi anime e cûr ae Cjargne inte sô interece, di là dai cjampanilisims. E je ancje une sorte di provocazion ae politiche dal teritori, dispès masse disinteressade a risolvi pardabon i problemis de mont.
“Carnorum Regio” al è ancje il titul dal cd jessût tal 2003 indulà che in plui dal “Imni de Cjargne” a son contignudis altris grandis composizions di Canciani, tant che il “Kyrie Solemnis” par Sant Ilari, patron de Cjargne.
“Carnorum Regio” al ven cjantât e sunât di plui o mancul dutis lis corâls e bandis cjargnelis in variis ocasions; e je resinte la propueste, no inmò uficiâl, di usâ chest imni ancje par vierzi lis partidis dal campionât cjargnel di balon. ❚
Alessio Screm
