LIS PARABULIS DI PRE ANTONI. Il poleç e la gjaline

Il Vanzeli al dopre parabulis par spiegâ l’amôr di Diu pal om. Ducj cognòs la parabule de piore pierdude o chê dal Pari bon e dal fi bintar… Pre Antoni a ‘nt conte une des sôs cul fin di spiegâ la stesse idee: Diu nol mole l’om, lu cîr, lu tire dongje, tant che la clocje cul poleçut.
pre Roman Michelot
Al sarès tant biel, ogni tant, lâ a lei chel grant libri che e je la vite dai animâi.
Cjapìn il câs dal poleç e de gjaline, che si pues vêlu inmò sot man o a puartade di memorie.
Il poleç al à une sole brame: torzeonâ ator pal curtîl e pussibilmentri plui in là. E si ben che al à talputis minudis minudis, al sgambete tant che un sfolmenât, cul risi di finîle intai pericui.
Ma la nature i à dade une fortune: di vê une mari ative. Di fat la clocje, a pene che lu viôt a slontanâsi, i cor daûr e in cuatri varcs lu à cjapât.
Il biel al è che, par tant che si slontani, nol rivarà mai a slontanâsi tant che la clocje no rivi a gafâlu e a taponâlu cu lis sôs alis. E se ancje al somee che al cori come un sfolmenât, al fâs pocje strade, parcè che al à lis talputis piçulis. E la clocje, ancje se al somee che e ledi plui planc, e fâs plui strade parcè che e à lis talpis une vore plui grandis.
Pensant al rapuart misteriôs fra l’om che al scjampe e Diu che i cor daûr, mi pâr di podê dî che il ream dai cîi al è compagn di un poleç e di une gjaline. ❚
pre Antoni Beline