Plui furlan in Rai, ducj dacuardi. Dopo de mozion, cumò si spietin i fats

L’Istât, si sa, al è stagjon di feriis: lis scuelis si svuedin e i mestris a tirin il flât lontan dal cisicâ dai canais, lis splazis e lis rivis dai flums si jemplin di cjar pronte a brustulâsi e i moscjins (e chês osteadis di raspulis) se gjoldin a passisi intor des cuessis crotis. Intai bancs dal Consei Regjonâl, dut câs, si va indenant a lavorâ a pro dai citadins e dal teritori, cuntun voli ancje a chel furlan. In gracie de sensibilitât e dal interessament dal Grup Consiliâr dal Pat pe Autonomie, cun di fat, ai 26 di Lui dut il Consei al à fate buine la mozion pe tutele des sedis furlanis de Rai, presentade di Massimo Moretuzzo e Giampaolo Bidoli al principi dal mês. Cheste aprovazion ae unanimitât e impegne la Zonte Regjonâl a metisi sot te cuistion, fasint presse al Consei dai Ministris e al Ministeri des Comunicazions par che e vegni ricognossude la impuartance dai studis periferics de Rai, che a àn di jessi indotâts di autonomie finanziarie e gjestionâl, rinfuarçant par prionte la sede udinese sedi a nivel tecnologjic sedi di personâl, in maniere di fâle deventâ un centri di produzion di programs in lenghe furlane.
Dome in cheste maniere si podarà pardabon sigurâ un servizi radiotelevisîf public di cualitât e meti in vore la normative statâl e europeane pe tutele des minorancis linguistichis, daûr dal model de Provincie Autonome di Bolzan.
Cumò che il troi al è stât batût, bisugne però viodi se il pît al varà avonde fuarce e voie par lâ indenant te marcje: no vin rivât a gjavâi fûr nuie di plui ae segretarie dal President Fedriga, ma nô o volìn crodi che, une volte tornâts in ufici dopo di une polse ae scuvierte dai lûcs di incjant dal nestri teritori e dal microcosmi des varietâts de lenghe, si metaran sot di buine uce par valorizâ cheste ricjece che nus fâs cussì speciâi. ❚
Serena Fogolini