Cemût fevelâ la marilenghe aes bestiis

Un gjat furlan vêr al sint dome “tui-tui”, il cjan “to-to” e par clamâ lis gjalinis baste berlâur “pii-pii”
Il sproc «Furlans, fevelait furlan!» nol vâl dome cuant che si à a ce fâ cu lis personis.
Dispès o dismenteìn che ancje lis bestiis di chenti a son furlanis e che, fin cumò, a jerin usadis a capî chê lenghe.
Al sarà par chel che cualchi volte nus cjalin un fregul di neri, cul cjavut in bande e une voglade smaraveade, a stan pensant:
«Ma parcè il gno paron si metial a talianotâ cun me, e no mi fevelial in marilenghe?».
Par vignîus incuintri e no fâ brutis figuris cun lôr, us ricuardìn cualchi espression tipiche par fevelâur ben.
Vêso un gjat? Par clamâlu, un gjat furlan vêr al sint dome “tui-tui”. Se al cumbine alc che nol va, o par parâlu vie, si dopre “ghets!”.
Indicazions pal cjan: “to-to” par clamâlu, “mars” par fâlu cori.
Par fâ come Sant Francesc che lis bestiis i vignivin dutis dongje, baste berlâ “pii-pii” aes gjalinis, cul dindi us covente invezit un biel “pitu-pitu”, “viri-viri” pes razis e pes ocjis, e al è ancje il “cjo-cjo” pal purcit. Pal mus?
“Eri” o “eri ca”.
Cumò sêso stracs di vêju masse intor di voaltris? Par mandâju vie, berlait “chis” al purcit e “sjo-sjo” aes gjalinis, che al ven bon ancje par razzis e ocjis.
No si doprin plui tant, ma se us capitàs di vê di vuidâ un cjaruç tirât di bestiis, ve ca: “iih”, “gjii” e “gjie” par fâ lâ indevant bûs e cjavai; par fâ lâ a çampe il bo, “bist” o “bistahâr”. Par fâ partî une vacje “alo”, par fâle lâ a drete, doprait “uôt” o “ôt”.
In sumis, tancj a disin che par fâ vivi il furlan si à prime di dut di doprâ la lenghe in famee, e e va ben. Ma al covente doprât ancje… tal bearç! ❚
Dree Venier