IL COMENT. Metodi Rosolen. La Fondazion che e mande a fonts la Universitât

Intune Regjon di un milion di abitants miôr vê dôs Universitâts piçulis o une grande? La domande e torne fûr dispès sul gjornâl di Triest Il Piccolo dulà che il sburt par incorporâ cors e facoltâts al è une vore penç. Soredut cul centridrete al guvier de Regjon e torne a fâsi fuarte la tindince a fâ crodi che al sarès di tornâ a unificâ i doi ateneus che intai ultins 40 agns si son disvilupâts in forme autonome.
Za tal 2010 Roberto Morelli, gjornalist professionist e docent di Teorie e Tecniche dal Gjornalisim te Facoltât di Siencis de formazion a Triest, al veve fat une propueste ai doi sistemis universitaris regjonâi di lâ viers formis di razionalizazion e di riorganizazion. A jerin peraulis in plene sintonie cul messaç de assessore regjonâl ae Universitât di in chê volte, Alessia Rosolen.

Al sarà un câs, ma cumò che la Rosolen e je di gnûf a cjâf di chest setôr si torne a scomençâ a dî di meti dongje lis fuarcis. Sinergjie, unificazion, tai dai doplons: chestis peraulis a tornin dutis intal discors che al è vignût fûr dal prin incuintri che Rosolen e à volut fâ cui retôrs di Udin e di Triest, Alberto Felice De Toni e Maurizio Fermeglia, e cul diretôr de Sissa, Stefano Ruffo. Covente fâ i conts, al somee, cu la duplicazion inutile dai cors di lauree, ma soredut la novitât e je la costituzion di une Fondazion uniche regjonâl pe Universitât che e varès di lâ a aministrâ i fonts pe ricercje, premiant lis iniziativis dulà che i ateneus si metin adun e cirint di specializâ ognidune des dôs Universitât in alc.
A presentâ chestis ideis, ancjemò une volte, su Il Piccolo, al è simpri Roberto Morelli che al è il puartevôs dal “metodi Rosolen”. A diference di agns indaûr, cheste volte al precise che nol sarès pussibil fondilis intune uniche “Universitât di Triest e Udin”, ma bisugne lavorâ par vê «dôs sedis distintis di un sôl ateneu slargjât». Ma il messaç pai furlans al è clâr: «Inte societât di trente agns fa, l’ateneu sot di cjase al sunave tant che un dirit. Vuê o savìn che e je stade une condane».
Par Triest, che e jere la uniche Universitât in regjon, di sigûr la nassite de Universitât di Udin e je stade une condane. Ancje parcè che Udin, purpûr cuntun sotfinanziament vergognôs, e je cressude une vore, fin a superâ Triest pe prime volte tal 2016 par numar di iscrizions. Il probleme che Rosolen e à voie di risolvi forsit al è chest. Se il finanziament des universitâts al ves di lâ daûr di cheste dinamiche, a Triest no varessin masse ce ridi: e alore la idee di un contignidôr par indreçâ ducj i contribûts publics pe ricercje e i contribûts dai imprenditôrs privâts e je perfete par tornâ a puartâ a Triest il balin des decisions e dai riparts.
Se i criteris doprâts a fossin chei dal merit, de ecelence dai progjets, de valorizazion dai zovins di talent, il retôr De Toni al podarès ancje fidâsi. Ma al è plui probabil che si ledi daûr de logjiche de ricercje dal consens e des “lobbies” politichis. E alore ocjo! Valie la pene di vendi la autonomie di une Universitât domandade cun fuarce dal popul furlan? Cence garanziis, al sarès un suicidi. ❚
Walter Tomada