Ce vuelial dî colâ dentri di un cuadri, esplorâ lis penombris di un afresc, fâ vivi une statue, sintî ce che nus conte une ancone, une miniature, une stampe? Cheste rubriche e puarte ae scuvierte des oparis di art che e je siore la Patrie, ma lis conte dal didentri, cu la vôs dai lôr protagoniscj, intun zûc gnûf e intrigant.
Giuseppe Zigaina (Çarvignan 1924 – Palme 2015) al pues jessi considerât un dai esponents plui impuartants dal Realisim furlan. Ilustradôr amât di Pasolini, al à curât lis taulis grafichis pe edizion dal so libri “Dov’è la mia patria” e i dissens pal film “Teorema”.
Il poete di Cjasarse lu preseave cussì tant che intal 1971 i fasè interpretâ la part dal frari francescan intal film “Decameron”.
Fondamentâl, tal 1983, la sô esperience al “World Prints” a San Francisco, là che – a partî dal dal 1984 – al fo clamât tant che professôr dal “Art Institute”, tacant ancje une colaborazion cu la Universitât di Berkeley.
Fuartone la sô personalitât tant come om che come artist. Il so materiâl di ispirazion lu gjavave fûr dal element popolâr, de vite dai lavoradôrs e des classis plui tibiadis te storie, intune clâf rivoluzionarie, buine di scombati simpri, cun luciditât e fuarce, ancje visionarie, cuintri dal podê, dai parons e dai siôrs, che lui ju considerave la plui grande aberazion de societât umane. Interessant sotlineâ che il contest culturâl tipic furlan, identitari, inlidrisât e radicâl, al à conferît a Zigaina il plui grant mot di ispirazion artistiche e poetiche, lant a cirî la anime dai furlans prime intai senaris dai cjamps e po dopo in chei des fabrichis.
Insome, inte filosofie dal lavôr e de fadie.
La opare presentade in cheste rubriche nus conte di une “metamorfosi”, ven a stâi di une trasformazion noturne là che i uciei de gnot e lis formis di vite in aparence plui insignificantis (larvis, lacais, viers) a deventin la clâf par capî il torment de Umanitât. E fâs part di chel percors peât a di un “realisim magjic” che al trasforme il paisaç intune proiezion di chel mont interiôr fat di fantasimis, animâi simbolics, visions che si compenetrin cul significât profont di une nature misteriose, cualchi volte incuietante, là che il dissen si sfante in ghiribiçs e anatomiis, fatis di sgrifadis sul sfuei a ponte di pene, evocativis di chel marum interiôr che al devente mît e liende.
Ducj i critics i ricognossin a Zigaina une capacitât grafiche e imagjinative straordenarie, che e fâs dai siei cuadris oparis di un bielece estraniante e uniche.
La campagne, dispès violade dal lavôr dal om, e devente la cussience di un vivi malât, imbastardît di fadie e di ribelion, di nostalgjie e di lirisim. ❚
Agnul Floramo
