Mandi nono!
Mandi frute, cemût?
Uh, nono, o ai propite dibisugne di une polse. O ai juste finît di discuti cuntune mari ta la chat di scuele.
Ta la… ce?
La chat*, nono, sù po, ti ai bielzà spiegât.
Ah, sì, la petechat, chê robe par peteçâ!
Eh, chê li.
Ma ce isal sucedût a scuele? Isal cualchidun che al barufe cul gno bis-nevodut?
No, no, no jentrin i fruts, nono, si fevelave di vacinis.
Di vacinis? E parcè fevelaiso di vacinis cu lis maris e no cui miedis?
Eh, sâstu cemût che a son fats i complotiscj…
Complo… ce?
I complotiscj, nono: chei che a crodin che dut al sedi un complot.
Dut ce?
Un grum di robis, nono: la industrie alimentâr, lis vacinis, lis strissis dai avions.
Lis strissis?
Chês che a lassin tal cîl i avions cuant che a passin.
E ce varessino di sbaliât?
Lis clamin strissis chimichis: a disin che lis doprin par cambiâ il clime.
Magari podessino, frute! Che in Friûl al plûf di 80 agns, dome che o sepi jo. Se a stan cambiant il clime, no stan cumbinant masse ben.
E dopo i aliens. Cualchidun al è sigûr che i aliens a son bielzà rivâts ca di nô, e che a lassin cerclis tai cjamps di forment.
Cerclis?
Cerclis, sì. Forsit par comunicâ alc. Cualchidun al dîs che a son retilians.
Se a son tant inteligjents a podaressin scrivi daurman cuatri peraulis, invezit di fâ dissegnuts! Dut câs, sui aliens forsit ur doi un pocje di reson ai tiei amîs complotiscj. Cun dute chê int strambe che e je ator… Cjale Toni, chel che al vîf in bande di Vigji, tal apartament dentri dal curtîl di Meni. Chel li, cuant che al ven l’Istât al sta dut il dopodimisdì distirât tal soreli, invezit di fâ l’ort o di lâ tal bar. Par me, al podarès jessi propit un retilian, cul sanc frêt come i madracs!
Ma nono, Toni nol è alien, al è dome triestin!
Tu âs reson, frute! Ma no ai ancjemò capît ce che a jentrin lis vacinis cui complots!
E je un grum di int che e crôt che lis vacinis a fasin deventâ autistics.
Po ben? Ce saressie di mâl? Cumò a vuelin jessi ducj professôrs e inzegnîrs, ma cuant che o jeri zovin jo, fâ l’autist al jere un biel lavôr!
Autistics, no autiscj! E je une malatie.
Ma lis vacinis no coventino propit par no cjapâlis, lis malatiis? Lassiju pierdi, chei complotiscj!
Sigûr, nono. La prossime volte ju mandi in chel paîs!
Sì, ma cul avion e dutis lis strissis! ❚
*viôt “La Patrie dal Friûl” di Lui 2017
di Bete di Spere
