De personalitât di Bobby Sands, de sô vite, de sô militance e plui in detai de sô permanence te preson di Maze, là che al è muart ae fin di un siopar de fam lunc e tragjic, a àn vût scrit in tancj di lôr e si pues dî la stesse robe in cont de cuistion irlandese e dal conflit te Irlande dal Nord. Cundut achel, no mancjin lis ocasions par tornâ a cjapâ sù chei temis e al è ancjemò alc di contâ o di tornâ a contâ. Lu conferme ad in plen il libri metût adun l’an passât di Riccardo Michelucci, che in graciis di cjapitui divulgatîfs sintetics e siôrs di dâts e di une selezion di scrits gjavâts fûr dal diari di Bobby Sands e dai siei articui saltâts fûr sul gjornâl “An Phoblacht – Republican News”, al rive a dâ sodisfazion sedi ae dibisugne di cognossince di cui che al sa pôc o nuie di chei argoments che al interès di cui che impen al cognòs bielzà chê storie, ma al vûl tornâ a lei alc.
R. Michelucci (cur.), Bobby Sands. Un’utopia irlandese, Clichy, Firenze, 2017
di Marco Stolfo
