IMNI DE PATRIE
A saran a disposizion i spartîts par bande, corâl, orchestre. Za tantis lis richiestis di ûs
Al sarà presentât in Setembar “In alt o fradis”, l’imni uficiâl de Patrie dal Friûl. Componût di Renzo Stroili Gurisatti pai tescj e di Valter Sivilotti pe part musicâl, l’imni al è stât sielt di une jurie di esperts tant che il miôr fra i dîs che a son stâts presentâts ae ARLeF, la Agjenzie Regjonâl pe Lenghe Furlane, intal ambit di un concors di pueste lançât l’an passât da Istitût Ladin Furlan e di Messaggero Veneto. La motivazion? Un imni dulà che la musiche e il test si integrin a vicende, midiant di une scriture vocâl e strumentâl di grant respîr e di slanç di cjant potent. La proclamazion e je stade fate a Voleson Darzin, in ocasion propit des celebrazions de Fieste de Patrie dal Friûl.
«Bandis, orchestris, corâls, associazions e citadins singui nus solecitin par podê disponi de version definitive – al dîs William Cisilino, diretôr de ARLeF -. O sin daûr a lavorâ, insiemi cui autôrs, par organizâ une “prime” di presentazion uficiâl dentri de fin dal mês di Setembar. Di chel moment, a saran disponibii – par cualsisedi che lu desideri – i spartîts intes variis declinazions (orchestre, bande, corâl), che si podaran doprâ intes ocasions uficiâls che a coinvolzin, simpri plui dispès, lis nestris comunitâts».
Intant, in spiete di scoltâlu in musiche, ve chi il test di Stroili Gurisatti: In alt o fradis, / o int di Aquilee, / devant da la Storie, / di front dal doman. / Sin flame ch’e vîf / pes stradis dal mont / sin non di une Patrie / sin fîs dal Friûl. // Scolte o Friûl, / o tiere di libars, / di lenghis e popui / sês cjase di pâs. / Dai secui i paris / nus clamin adun / a fâsi lidrîs di unic destin. // In alt o Friûl, / o Patrie mê sante, / di fuarce e sperance / si viest la tô int. / Un popul sigûr / ch’al cjamine te lûs / incuintri al doman, / incuintri ai siei fîs.
par cure de Redazion
