Ce ise la European Free Alliance

Il partît furlanis Patrie Furlane al è entrât inte European Free Alliance, il grup democratic dai popui di Europe, che al met dongje lis fuarcis plui rapresentativis des minorancis tai singui Stâts dal continent. Patrie Furlane e je stade integrade in cheste rêt fate dai moviments politics plui impuartants a nivel nazionalitari dal mês di Març passât. L’EFA e conte su fuarcis tant che il Scottish National Party e la Esquierra Republicana de Catalunya. Fuarcis impuartantis, che a son buinis di meti insiemi ben 12 europarlamentârs e duncje a rivin a fâ pesâ ancje tal Parlament European di Brussel e Strasburc lis resons dai popui plui piçui che la storie e à condanât a jessi minorizâts.
«O vin volût cun fuarce cirî la adesion ae Efa – nus spieghe Federico Simeoni, conseîr provinciâl di Patrie Furlane – parcè che la nestre int e à bisugne di contâ di plui, e stant che il Stât talian nol ten cont de nestre realtât di popul, al è just cirî di movisi in rêt cui altris popui che a vuelin une Europe des Regjons dulà che lis diferencis a deventin une fuarce e no une debilece». Resonament che Simeoni al à aplicât ancje al Friûl-Vignesie Julie, dulà che e je za presinte dal 1991 une des plui vecjis formazions politichis che a àn aderît ae Efa, la Union Slovene (Slovenska Skupnost).
Di fat dome cors, bretons, catalans, bascs, galês, scozês e frisons a àn une militance plui lungje inte Efa dai slovens: cuant che chei de Ssk a àn savût che Patrie Furlane e à fat domande di afiliazion, a son stâts une vore contents di meti une buine peraule. E cussì, inte plenarie di Katowice, in Polonie, il Friûl-Vignesie Julie al è deventât la uniche Regjon taliane cun doi partîts afiliâts ae Aleance. Inte patulie taliane de Efa a son ancje la Liga Veneta, la Sudtiroler Freiheit, il Partît Sart di Azion e i valdostans de Alpe (Autonomie Liberté Participation Écologie). Chescj ultins doi partîts, come la Ssk, a son presints intai lôr conseis regjonâi dulà che a àn madressude une culture di guvier, ma il lôr sium cumò al è chel di jentrâ a fâ pesâ lis minorancis intal Parlament di Rome e magari ancje in chel european. (W. Tom.)