Il Mestri Canciani e la culture furlane

O vin domandât al mestri, compositôr e studiôs di Paulâr Giovanni Canciani, di dânus une sô impression su la gjestion culturâl inte nestre regjon, ancje ae lûs dal progjet Tumieç Citât Alpine. Chi in rie lis sôs peraulis.
«Ce mai vuelial dî “culture” pe Regjon Friûl-Vignesie Julie? Isal spetacul, intratigniment, diversîf o cognossince, divulgazion, cressite, scambi tai cjamps dal savê? Al è un pieç che l’assessorât ae culture e ancje chel dal turisim si pontin di promovi cuasi dome chei “events” – un altri tiermin imbastardît, che al lasse il timp che al cjate -, che a son bogns di fâ rivâ miârs di personis intes nestris tieris. In Cjargne no mi pâr trop. A ogni mût, si trate di personis che dispès no consumin. A rivin, si puartin cun lôr ancje il mangjâ, a viodin, a scoltin e po dopo a van. Ce sisteme, e dut par monadis che cu la culture no àn nuie a ce fâ!
Chi si dovarès fâ la culture de storie dal teritori, che e dovarès jessi ae fonde des cognossincis storichis, dal ambient, de art, de lenghe e vie disint. Ma nissun al sa plui nuie, e chei pôcs che a san a son simpri plui vecjos. Si à miôr promovi chei sacrabolts di “events”, che pardabon no àn nuie di evenemenziâl. Tant che il progjet di Tumieç Citât Alpine. Nuie al è cambiât e Tumieç al è simpri plui desert. Al jere miôr se a spindevin chei bêçs, che inmò no si è capît ben cemût che a son gjestîts, par tornâ a meti in vore la fabriche di schîs Lamborghini, o par riproponi il sisteme di Jacopo Linussio cu la tiessidure.
Invezit no, a àn imbarcjât tantis robutis che a clamin “events” e dut al reste come prime. Mi displâs ancje notâ che ultimementri nol è mai rivât nissun sostegn ae associazion “Gli amici della Mozartina”, che o soi jo president. Pûr vint partecipât ai bants de regjon, come simpri, i ponts pai miei progjets a son dispès masse bas par ricevi aiûts. E pensâ che a son sessante agns almancul che o lavori inte culture, a ducj i nivei. Prime a Torin, par ben 40 agns, e po dopo in Friûl. Nol reste che oponisi a chest sisteme malât di intindi la culture, e o ai miôr fâ lis domandis in maniere direte al guvier centrâl talian, plui che a cheste regjon che secont me no merete plui di vê la autonomie».
✒ Alessio Screm