Çurviei Scjampâts: la emigrazion dute di ridi tal spetacul dal Teatro Incerto

“Mata il furlan!” E je une des tantis batudis dal spetacul Çurviei Scjampâts di chei trê dal Teatro Incerto che si à podût viodilu il 16 di Avost a Vilecjaze. Si fevele di cerviei furlans che a an scugnût lâ a cirî fortune vie pal mont, par vie che chenti e comande la cjarte bolade, e là vie, invezit, ti disin va là, va là…E alore vie lôr i mior cerviei, cui in Spagne a fâ il torero, cui sul lât Titicaca, cui sulis piramidis di Egjit, cui cja’ dal diaul a componi musiche che culì nissun le capirès. E ducj a spietin il cont Tabacchi che al à di menâju vie cul so avion personâl e che, naturalmentri, nol viot l’ore di finanziâ lis lôr scuviertis sensazionâls.
Ma intal spetacul a son ancje emigrants vêrs, un tecnic informatic che al vîf a Londre e che al conte lis disaventuris di un emigrant di vuê cence dismenteâ trop plui crudis che a son stadis chês dai emigrants di îr l’altri (il so von, pe precision, in chest cas, emigrât in Rhodesie) e l’astrofisic che al vierç la prospetive sul univiers des galassiis e nus fas ancjemò une volte pensâ trop picinis che o sin, noaltris oms! E po al è ancje un marchês che nol lavore par vie che lavorâ al è volgâr e, sul ultin, il cont Tabacchi al salte fûr pardabon, dut vistût di blanc, cui spietâsal!
Duncje une part serie e une di sbregâsi des ridadis (che par dî il vêr no mancjin nancje inte part serie). La culture no à di sei dome seriose, e pues ancje fâ ridi.
Ma par fâ ridi pardabon e à di sei inteligjente. E alore e devente un patrimoni, sicu che al è aromai il Teatro Incerto pe culture furlane. E no je vere che la int e domande dome lis fufignis che nus strucje intor la television. I Colonos a son simpri plenons cuant che a recitin li Moret, Fantin e Scruzzi, no son mai vonde cjadreis par ducj. Ma ancje cui che al è in pîts nol viôt il timp passâ, al è un divertiment che al displâs che al finissi. Scruzzi al jemple la sene, al fâs ridi ancje cun nuie, dome cul movi des mans e cun batudis che a saran ancje studiadis e provadis, ma che a somein propit nassi li sul moment.
✒ Laurin Zuan Nardin