La cuviertine dal CD

Si pues scoltâle in dutis lis plateformis web plui famosis: itunes, spotify, deezer, soundcloud e youtube, dulà che e si pues viodi ancje il biel video. Il progjet al viôt protagonist il côr di frutis e fantacinis VocinVolo direzût di Lucia Follador, une realtât corâl cetant laboriose nassude tal 2006 Inte suaze de Associazion Ritmea di Udin. La idee e jere, e e je ancjemò, chê di fâ beneficence a pro dai taramotâts dal centri Italie, midiant di un cjant che al ricuarde lis vicendis leadis al taramot in Friûl dal 1976.

La cjançon si clame «No Smenteâ», e e je stade scrite di Roberto Piuzzo e Guido Covazzi, rangjade di Alessio Venier, adatade par côr dal chitarist Marko Feri e dal pianist Giovanni Molaro, cu la partecipazion dal baterist Giorgio Fritsch. Il lavôr in studi al è stât curât di Stefano Amerio di Artesuono e la direzion dal insiemi vocâl de diretore Lucia Follador. La iniziative, in origjin e jere saltade fûr su pes riis de riviste dai Fogolârs, in particolâr di Monica De Paoli de Famee Furlane di Hamilton in Canadà che e domandave une regjistrazion dal toc No smenteâ, se mai cualchi corâl le veve realizade o le veve in repertori.

Di chi, la idee di coinvolzi il côr VocinVolo, ancje se la lenghe furlane no vignive di regule doprade di cuasi nissune des coristis. Chestis fantacinis a àn bielzà vinçût un apontament impuartant sui cjants par furlan, il Festival dai Fruts Furlans, e a tignivin in repertori tocs straordenaris tant che Staimi atents, Ai preât e Suspîr da l’anime. Il video ( cirî “No Smenteâ” o pûr “Do Not Forget” su You Tube o cun link https://www.youtube.com/watch?v=HGpgrH97-u0) al mostre ancje une schirie origjinâl di fotografiis dal Friûl taramotât intai prins dîs daspò dal sisme. Daûr la partidure dal toc - metût in vore ancje intal repertori des corâls di Melbourne, Toronto e Cosean - a van fûr tal mont lis notis cjantadis di VocinVolo, zovinis ambassadoris di solidarietât e di amicizie cence confins.

✒ Alessio Screm