Il Parlament de Patrie, sîs secui di storie
In principi al jere une tesi di lauree e cumò finalmentri al è un libri di lei. Il volum si clame Il Parlamento della Patria del Friuli. Storia della più antica Assemblea legislativa d’Europa (1228-1805) e il so autôr al è Guglielmo Cecone, che tal 1978 al sierave la so esperience di student in Siencis politichis a Pisa propit cuntune ricercje dedicade al Parlament de Patrie. I contignûts di chel lavôr, cun cualchi piçul inzornament e intune vieste editoriâl che in chel istès e je semplice e siore, cumò a son a disposizion di ducj e al è ben e al conven.
Il libri al conte une storie che si le cognòs pôc e che e merete cognossude, in Friûl e ancje inaltrò. Cuntune vision complete e cun tancj riferiments specifics e di detai, Cecone al presente la ativitât, la struture, il funzionament e la evoluzion di chê istituzion, dilunc vie dai secui e inte suaze di etis diferentis, di chê dal Patriarcjât a chê de dominazion di Vignesie fintremai ai ultins agns sot de Austrie.
G. Cecone, ‘Il Parlamento della Patria del Friuli. Storia della più antica Assemblea legislativa d’Europa’, Corvino, Feagne, 2017.
_____________________________________________________________
‘Ses’, de Galizie musiche vive cuintri de estinzion
‘Ses’ al è il non che za di cualchi an al ven doprât de bande de cjantautore galiziane María Xosé Silvar te sô ativitât artistiche. Te Sierade dal an passât e à dât fûr il so gnûf disc dal titul ‘Opoñerse á extinción’ (ven a dî: «Fâi cuintri ae estinzion»), che cu la colaborazion di une schirie di musiciscj al met adun dodis cjançons, che a pandin energjie, passion e voie di esisti e di resisti.
Di ‘Torre de Almasí’, che al vierç la racuelte cu la sô sgrimie rock’n’roll, ae balade dolce e crepuscolâr ‘Semente de vencer’, che e siere la scjalute dal disc, passant – tra lis altris – par ‘Desde o altar’, ‘ A paz esquiva’ e ‘Polo teu corazon’, e je une biele varietât di sonoritâts e di atmosferis, là che si incrosin riferiments ae tradizion de Galizie, influencis de Americhe dal Sud, blues, rock e pop scalembri e tescj pal ‘galego’ che a contin storiis di amôr, di rabie, di malincunie, di vite.
Ses, ‘Opoñerse á extinción’, cd Fol Altafonte, 2017.
par cure di Marco Stolfo
