Dut si pues dî, ma no che la leç eletorâl Italicum no vedi il non just.
_Un spieli perfet de Italie: e garantìs il puest simpri a chei, cul capolista bloccato. I da une man al plui fuart cul premi di maiorance.
E je stade fate prime de aprovazion dal sisteme istituzionâl gnûf (po dopo fermât dal referendum dai 4 di Dicembar), tant che un abûs edilizi.
_Par prionte, no rispiete la minorance furlane. Cun la determinazion dai coleçs eletorâi dal Italicum il Friûl al è stât spacât in doi cuntune part sot Triest.
Chei che a votaran in chê, a coventaran dome a mandâ su candidâts triestins. Nol sucêt cussì in Trentin e Sud Tirôl, li che i coleçs a son plui piçui, fats daûr de presince des minorancis sul teritori.
_La gnove leç e je stade judicade de Cort Costituzionâl e in part mandade indaûr, duncje si ‘nd à
di fâ une gnove. Al è di tignî prisint che la Consulte no à tocjât il cantin des circoscrizions eletorâls parcè che il tribunâl di Triest – che al à di trasmeti ae Cort lis cuistions – al à pensât ben di no mandâlu indevant. No parcè che nol podès vê mani, ben si intint: dome parcè che no lu à judicât rilevant.
_Di sigûr la discussion par vê une gnove leç eletorâl e sarà lungje, ancje parcè che e je dute une part dal Parlament che e à l’interès di puartâ indevant la legjislature il plui pussibil, ancje par facendis di tacuin.
_In chest mismàs al sarès spazi par un intervent di bande de nestre Regjon. L’imprest si clame voto alle Camere: in pratiche une mozion che, fate buine dal Consei Regjonâl, e ven presentade al Parlament li che si invide a tignî presinte une cuistion. Chest voto al pues jessi ancje une leç fate e finide.
_La Regjon Speciâl Friûl-Vignesie Julie e podarès presentâ une propueste par fâ rispietâ lis minorancis dal so teritori e magari une leç, che e sarès une propueste fûr dai partîts e duncje di vêts politics. Cuissà che nol puedi jessi fat bon un ipotetic… Furlanellum. A ogni mût, cheste azion e metarès un principi ae atenzion dal Parlament: si à di tutelâ lis minorancis dentri dal Friûl.
_Ma parcè la Regjon e parfin i parlamentârs di Triest varèssino di sburtâ cheste risoluzion? Parcè che garantî lis minorancis orepresint al è il rimpin plui salt par garantî la specialitât de Regjon, che e conven ancje a Triest. Forsit ancje di plui che al Friûl. ❚

✒ Dree Venier