Sfuei Mensîl Furlan Indipendent
Archivi de Patrie

FRIÛL EUROPE. Suns e siums di un Friûl european

............

Il Friûl in Europe, la Europe in Friûl e il Parlament European (PE) che al da segnâi di vite. Lis ultimis setemanis a son stadis pardabon plenis di novitâts. Tra lis plui bielis a son chês che a tocjin i rapuarts tra Friûl e Europe, almancul tal cjamp de produzion culturâl, de promozion dai dirits linguistics e de valorizazion des nestris specificitâts in relazion positive cun chês di chei altris, ator pal continent e magari ancje plui innà.
Cun cheste cjaladure specifiche, la atenzion e cole naturalmentri su Suns Europe, manifestazion che ai prins di Dicembar si à confermade in chel istès un barcon viert su la diversitât linguistiche de Europe, une vetrine europeane pe produzion musicâl, audiovisive e leterarie nostrane par furlan e une ocasion di incuintri e un moltiplicatôr di relazions e di colaborazions che se a vignaran gjestidis cun coerence e cun sintiment a saran pardabon zovevulis par ducj.
Za intant de conference stampe di presentazion de manifestazion, ai 23 di Novembar, si à palesade une cussience fuarte in chest sens, cuntun ategjament positîf e propositîf, no dome de bande dal president de ARLeF, Lorenzo Fabbro, dal assessôr regjonâl pe agricolture, Cristiano Shaurli, e dal president de Fondazion dal Teatri gnûf ”Zuan di Udin”, Paolo Vidali, ma ancje de bande dal assessôr pe culture dal Comun di Udin, Federico Pirone. Se si pense ae citât basche di Donostia-San Sebastian e al sucès che a àn vût la sô candidature tant che capitâl europeane de culture e cumò il so jessi capitâl culturâl vie par chest an, simori cuntune caraterizazion specifiche in tiermins identitaris, al vignarès di pensâ che, cuntune cussience e cuntune vision strategjiche di chê stesse fate, la capitâl del Friûl tal avignî e podarès fâ compagn e cun risultâts positîfs. Cuissà!
Par sigûr il Friûl al à mostrât ae Europe la sô muse miôr, chê multilengâl e multiculturâl, za ai 27 di Otubar di chest an. Al è sucedût a Bruxelles inte sede prestigjose dal Comitât des Regjons de Union Europeane, là che si à davuelt il Seminari anuâl dal NPLD (Network to promote linguistic diversity – Rêt europeane pe promozion de diversitât linguistiche). L’incuintri al è stât une ocasion par fâ il pont de situazion in cont dal rûl des lenghis minoritariis intes economiis europeanis e des potenzialitâts dal multilinguisim tant che fatôr di cressite economiche e ocupazionâl intes regjons de Europe. Inte suaze de cunvigne, inmaneade cu la colaborazion de Regjon Friûl-VJ e de ARLeF, e je stade presentade ancje la situazion des lenghis «altris» de regjon che e ten dongje la plui part dal Friûl cun Triest: il furlan, il sloven e il todesc.
In chê stesse zornade, prime di sere, li dal Ufici di Colegament de Regjon a Bruxelles e je stade screade la mostre “Furlan lenghe de Europe”, e je stade fate la presentazion de publicazion“99 domandis: diversitât linguistiche e dirits linguistics” e a son stâts un moment musicâl cun Loris Vescovo e une cerce di prodots tipics furlans par cure dal ERSA.
Tor de fin dal mês passât, joibe ai 24 di Novembar, inte sentade plenarie, il Parlament European al à fate buine – cun 479 vôts a pro, 37 cuintri e 107 astension – une risoluzion che e domande di fermâ i negoziâts cu la Turchie in cont de sô adesion ae UE, cuintri des misuris repressivis e des tantis violazions des libertâts e dai dirits di fonde metudis in vore de bande dal guvier di Ankara.
Juste tra la fin di Otubar e i prins di Novembar a son stâts sierâts altris cuindis media curdis e a son stâts arestâts diviers di lôr, tra gjornaliscj e dirigjents dal cuotidian Cumhuriyet, vôs de oposizion laiche turche. Cun di plui a son stâts impresonâts Selahattin Demirtaş e Figen Yüksekdağ, i doi copresidents dal Partît Democratic dal Popul (HDP), il tierç partît par numar di deputâts dentri dal Parlament turc e la fuarce principâl di oposizion al regjim dal president turc Recep Tayyip Erdoğan.
se (e viceversa).
Se la Comission Europeane no les daûr de indicazion dal PE al sarès un altri segnâl une vore brut, e no dome pe Europe. ❚
Marco Stolfo

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +