IL PERSONAÇ STORIC. Lea D’Orlandi

Lea D’Orlandi, (Udin 1890 – Udin 1965), laureade inte Universitât di Bologne tal 1915, si è ocupade di teatri e di etnografie, si che e je une des plui impuartantis studiosis che a àn metût dongje materiâl par studiâ lis lidrîs de culture dal nestri popul furlan. Impuartantone la sô colezion di proverbis, ma ancje la grande produzion di oparis di piture, ritrats, stampis e dissens. Profughe  a Firenze tal 1917, e publiche il volumut “Il Friuli”, pandint vie pe Italie l’amôr pe sô tiere. La sô storiute “Barbe Basili e il Paradîs”, e fo tradusude par todesc di O. M. Polley, gjoldint di un grant sucès. E à scrit une vore in lenghe mari. In virtût dal so impegn sientific, il museu furlan des arts e des tradizions al à podût nassi e cressi a bon pro dal materiâl cjapât sù intune vite di passion e di ricercje. ❚
✒ Agnul Floramo