RICETE. Weinachtenstollen (pan dolç di Nadâl ae todescje)

Timp pe preparazion: 1 ore, plui une altre ore tal for
Ingredients par cuatri personis
700 gr di farine Manitoba, 1 sedonute di mîl, 1 dadut di levan di bire, 150 gr di ue calabrie, 150 gr di scusse di naranç candide, 100 ml di rum, 2 ûfs, 250 ml di lat, 100 gr di mandulis brustuladis e taçadis gruessis, zenzevar e cardamomo in polvar, une steche di vanilie, 300 gr di spongje, 200 gr di zucar, sâl, la scusse gratade di un limon.
SI FASIN CUSSÌ
Il plui classic dai dolçs todescs di Nadâl, popolâr ancje in Friûl, lunc il confin. Si tache metint in muel te aghe cjalde, cuntune sedon di rum, la scusse di naranç candide e la ue calabrie. Fâ smolâ il levan intun tic di lat clip, zontant une sedonute di mîl e une sedon o dôs di farine, tant di fâ une pastele, e strucjâle tal rest de farine, fasint une buse tal mieç, cence impastâ dut. Sierâ cuntun tic di pelicule e lassâ che il levan si sglonfi, par une miezorute. Intant, tal rest dal lat clip, zontâ lis semençutis de vanilie, lassant dentri la scusse, e intant che si saurìs, sbati i ûfs. Zontâ il lat ae vanilie ai ûfs, e ancje il zenzevar e il cardamomo, une piçade di sâl e la scusse di limon. Tacâ a impastâ levan e farine; cuant il panet al sarâ biel amalgamât, zontâ il compost di ûfs e lat, po dopo ce che al reste dal rum, il zucar, e – ae fin, cuant che l’impast al sarà biel slis – lis mandulis, la ue calabrie e la scusse di naranç suiade e passade intun tic di farine. Lavorâ inte classiche forme ovâl e meti tal for cjalt (static) a 180° par 60-70 minûts, fin che al sarà biel ambrât. Ancjemò cjalt, pinelâ cun spongje disfate e spolvarâ di zucar a vêl. Lassâ disfredâ suntune gridele (ideâl, prime di mangjâlu, lassâlu un pâr di dîs intun sfuei di stagnole). ❚
Margherita Meggy Timeus