Segnaletiche paritarie talian-furlan: il biel esempli de biblioteche di Tavagnà

A Novembar e je stade screade la gnove sede de biblioteche comunâl di Tavagnà, une struture spietade di tant timp al servizi de comunitât locâl. Ma no dome di chê: la biblioteche e fâs part dal Sisteme Bibliotecari di Udin e dal hinterland udinês, duncje ancje di un teritori plui slargjât, e e pues vignî buine ancje par chel tal cjamp de informazion, dal divertiment e de agregazion.
Une biele notizie, duncje, ma a chest si zonte une notizie biele ancje tant: in dute la comunicazion dentri (cartei, indicazions e v. i.) si dopre in maniere paritarie furlan e talian. Cussì al sarà ancje pai avîs o comunicazions che a laran fûr (depliant, avîs di cunvignis o iniziativis e v. i.).
Une iniziative che e varès di jessi normâl: ogni gnûf cartel public tes zonis furlanofonis al varès di jessi bilengâl. Magari cussì no, che un Comun lu vedi fat e je une notizie, invesit che une pratiche normâl. Propit di pôc, invezit, a son stâts dai comuns che no àn fat cussì.
Par dî un, chel di Udin, che nol à metût i cartei bilengâi cuant che al à tornât a fâ la segnaletiche di strade intune zone ae fin di viâl Cadore. O fasìn presint che fâ cartei cun dôs scritis al coste compagn, sore che jessi just.
La biblioteche di Tavagnà e je intun lûc centrâl di Felet, dongje des scuelis, dal municipi e di altris struturis di incuintri e al dopre tal stes timp un spazi bandonât rindintlu funzionâl. La struture e met a disposizion libris, la racuelte “Cine” cun dvd e blu-ray, periodics e ancje la pussibilitât di doprâ lis postazions informatichis e telematichis in spazis luminôs e comuts sedi pai grancj che pai piçui. ❚
✒ Redazion