Fontanini al poie lis istancis dal Ent

«L’Ente Friuli nel Mondo al è il plui antîc, adiriture il prin di cheste sorte che al è nassût in Italie (ai 20 di Jugn 1953) par mantignî i rapuarts cui furlans de diaspore. Al ten dongje 156 Fogolârs, cun passe 23 mil socis in dut il mont.». Il president de Provincie di Udin Pieri Fontanini, vie par une conference stampe, adun cul president dal ent Pittaro, al à sburtât par meti man ae situazion dai tancj ents che si ocupin di emigrants, zontant: «a bastaressin chescj elements par dâi al ent la impuartance che al merete. Invezit la linie cjapade de Zonte regjonâl Tondo e mantignude di chê Serracchiani e je di une rapresentance dai emigrants fruçade in masse organizazions e cuntune division des risorsis che no ten cont des variis realtâts». ❚
O.P.