Fâsi gloti dal mont o tornâ a meti in vore il sens di comunitât, fonde dal nestri vivi? Ve parcè che bonsignôr Genero ai 3 di Avrîl al à clamât i furlans a une Assemblee

La so predicje pe Messe pe Fieste dal Friûl in Domo a Cividât ai 3 di Avrîl e à fat scjas e dismot une vore di interès. Bonsignôr Guido Genero, Vicjari gjenerâl de Arcidiocesi di Udin, al à di fat clamât i furlans a une sorte di mobilitazion par une gnove “stagjon de sperance” che si pee al recupar de lôr identitât comun. Une identitât che e à un leam cu la Glesie a partî de sô stesse divignince, che è met lidrîs intal patriarcjât di Aquilee: ma che in dì di vuê e à di cjatâ une adesion di bande dal cuarp intîr de societât furlane.
Lis rispuestis no si son fatis spietâ e a distance di cualchi setemane bonsignôr Genero nol à dubis di vê fate la sielte juste tal butâ chest clap te aghe de nestre autonomie. “O pensavi di tant incà a fâ – al spieghe – cheste propueste. Vint passât il periodi daspò dal taramot che inte disgracie nus à dut câs dade la ocasion di metisi dongje par pandi la nestre identitât di furlans in maniere sclete e costrutive, o pensi che al sedi di fâ dut ce che si pues par no dismenteâle e tignî cont di jê prin che ai furlans ur tocj di pierdile, o che a sielzin di vendile par un blanc e un neri”.
––––
Il so messaç al è une vore sclet: no aial pôre di strumentalizazions?
No, nol è nuie di sbaliât a sburtâ i nestris fradis a jessi ce che o sin. Anzit, al pues jessi une vore util a ducj scuvierzi, o riscuvierzi, la nestre vocazion di popul tra i popui di une gnove Europe che pe prime volte inte sô storie e pues permeti a dutis lis sôs gjernaziis di vivi in plenece la lôr identitât in maniere libare, e tal rispiet e tal ricognossiment dai lôr dirits. Ma par che un popul al sedi bon di fâ valê i siei dirits, al à prin di dut di ricognossisi inte sô identitât storiche, linguistiche e culturâl. Par chest, al covente un moment di convergjence, un moment di union par tirâ dongje dut ce che cumò si è fruçonât in mil tocs, ven a stâi lis mil animis di chest Friûl.
––––
Cemût saressino di tirâ dongje?
Une assemblee dal gjenar e va studiade. No soi jo a volê ni a podê dâ conseis di caratar juridic o esecutîf su cemût che si à di inmaneâle, ma e podarès vê la forme dal Forum, dal Laboratori, ce saio jo? La cuistion no je la forme, ma il contignût: al covente un puest dulà che almancul une volte ad an i furlans si confrontin in maniere democratiche e partecipade su ce che a vuelin jessi intal avignî. O pensi a une forme alte e biele di convergjence, dulà che partîts, categoriis economichis, inteletuâi, membris des associazions e des comunitâts, a sclarissin lis liniis di cemût che si à di operâ intal mont par fâ viodi une autentiche sintonie di comunitât. O pensi a mozions unitaris che a dedin la linie a ducj par no fâ plui cressi un grum di furlans che a van indevant “di bessôi”, ma un popul che si da dongje come che al à fat dopo la vuere o dopo il taramot.
––––
Cui varessial di meti adun dut chest orghin?
A coventin personalitâts indipendentis e ricognossudis dai furlans par ce che a àn fat a pro dal Friûl e de sô autonomie. Cualchidun come Zuan Francesc D’Aronco o Sergio Cecotti o pre Duilio Corgnali, juste par fâ cualchi non. E covente int che e vedi scolte e che i furlans i rispuindin, che a metin cûr e cerviel pal ben de nestre tiere. No pues jessi une robe pilotade de Glesie come istituzion: e nancje di nissun partît, parcè che cheste assemblee e à di jessi fondade sul dialic e la discussion e e à di dâ rapresentance a ducj. Si à di lâ viers di une gnove Costituzion de Patrie dal Friûl.
––––
Ma no isal il pericul di sierâsi e di fevelâsi intor?
Il mont si sta savoltant, la Europe e sta mudant piel e i savoltaments dal mont a puartin ancje tal mieç des nestris comunitâts gnove int. Ce si puedial fâ? Fâsi gloti dal mont o tignî cont des lidrîs e ciri, cence fâi tuart a di nissun, di tornâ a meti in vore il sens di comunitât che al à simpri coventât di fonde al nestri vivi? O podìn sielzi se platâsi, forsit par simpri, striçâts de globalizazion come prin de vuere nus veve striçâts la ditature, o jessi ce che o sin, mostrâ la nestre muse: e i furlans di chenti e di inaltrò a varessin di vê braùre di fâlu.
––––
Il confront al à di jessi ancje cul forest, duncje…
Sigûr, no dome parcè che tancj nestris confradis a son sparniçâts ator pal mont e noaltris no fasìn avonde tesaur di cetant ben che a àn fat; ma ancje parcè che a son altris popui ator pe Europe che a àn ce insegnânus. Catalans, scozês e altris: se al è alc di imparâ di lôr, parcè no fâlu?
––––
La Glesie ce rûl varessie?
Sul teritori la Glesie e cres su lis lidrîs di Aquilee. Il Sinodi diocesan dai agns ’80 al à sclarît bielzà ce che al vûl dî spandi la cussience di cheste ereditât sul teritori. Bisugne puartâ chest messaç ancje a cressi intes Diocesi di Pordenon, Gurize e Concuardie e sù pe Cjargne che e à ancjemò plui bisugne par resisti al dispopolament di une gnove idee di avignì che e rivuardi dute la nestre tiere. O vin di trasmeti ai zovins l’amôr pe lôr divignince: ma chest si pues fâ dome mostrantjur che a chest Friûl o vin voie di dâi un doman.❚
Walter Tomada