Za ladis 5.000 copiis dal libri su Pre Toni

«La fatica di essere prete» (ed. «La biblioteca dell’immagine»), il libri interviste su pre Toni Beline scrit di Marino Plazzotta, al à esauride la prime e la seconde stampe (dâts de fin di Jugn, ndr): a vûl dî che si son vendudis za 5.000 copis. Plazzotta al è stât clamât a presentâ chest libri fintremai di Rome. A proposit de sielte di pre Toni di permeti la jessude di un libri su di lui scrit par talian, Plazzotta al dîs: «La robe che plui mi à colpît in cheste esperience a son stâts i ringraziaments par vê rindût leibil une peraule che, stant che la marilenghe e je simpri mancul cognossude, e stente a jessi capide». Il libri al à rindût plui facilmentri acessibil il pinsîr di Beline: «Nol è che no si sinti afiet pe lenghe, che e plâs ancje ai fîs – se ben che aromai a cjacarin nome par talian – ma no si rive plui a imagjinâ il savôr di une lenghe partide di tant lontan. Eco bisugnarès propit fâ sintî ches savôr». Un grant sucès che però i sburte un tic di marum a Plazzotta: «Pre Toni, cence fâle lungje, al mertave prime ce che cumò, muart, i vuelin dâi. O finìs lis mês presentazions disint a la int che se a vuelin onorâ la memorie dal om a àn di scomençâ a lei dôs riis in dì dal so plui grant lavôr: la Bibie voltade par furlan». Se cualchidun al vûl contatâ Marino Plazzotta par presentazions o domandis al pues fâlu li dal so blog: http://gosperidea.blogspot.com
Redazion