Cun “Video Memoriis dal Friûl” a tornin a jessi disponibii i documentaris zirâts tai Agns ’70 di dôs studiosis che a crein un puint tra i rîts dal passât e la societât di vuê
Ce valôr puedino vê lis tradizions di un timp, in dì di vuê? Si rivaressie a dâur un respîr moderni, creant un puint tra i rîts dal passât e la societât di cumò?
◆ E je cheste la disfide cjapade sù Societât Filologjiche Furlane cul font Pellis-Ciceri, une des racueltis di caratar etnografic tra lis plui antighis di Europe, che e cjape dentri i documentaris des studiosis Olivia Averso Pellis e Andreina Nicoloso Ciceri, zirâts tra il 1972 e il 1975.
I videos a son stâts restaurâts, catalogâts e digjitalizâts, di mût di lassâju a disposizion dal public, ma dongje di cheste operazion di recupar, il progjet “Video Memoriis dal Friûl”, metût in pîts in gracie di un contribût regjonâl, al à puartât indenant ancje un percors di riscuvierte e restituzion ae comunitât, cun dute une schirie di incuintris sul teritori.
◆ I vot documentaris, realizâts cun cineprese Super 8, a mostrin cualchidune des tradizions furlanis plui sintudis e particolârs, tant che il carnevâl intal Friûl di soreli jevât, la Vie Crucis di Nert (“Croci sul Vajont e Venerdì Santo Hora Nona”), il mac di Sant Zuan e lis cidulis a Çurçuvint, la bussade des Crôs di Zui, il Pan e Vin di Budoie, la fieste dal “Mai” a Lucinîs (“La festa dei vent’anni”) e la novene di Kras di Drencje. Lis senis a son stadis montadis cu la vôs de Ciceri che e sclarìs i aspiets antropologjics des diviersis usancis e la lôr presince a nivel regjonâl.
◆ Cuarante agns dopo, il materiâl des dôs ricercjadoris al è passât tant che un testemoni intes mans di altris doi zovins studiôs furlans, la antropolighe Marta Pascolini e il regjist Marco D’Agostini, che lu àn consegnât di gnûf aes comunitâts di Budoie, Çurçuvint, Lucinîs, Nert, San Pieri al Nadison (li dal museu SMO – Slovensko multimedialno okno).
“Nissun di noaltris si spietave une partecipazion tant fuarte di bande dal public”, a confessin i doi curadôrs. “A son stâts apontaments, tant che chel al SMO, li che la sale e jere folcjade di int”.
I incuintris a son stâts la ocasion par tornâ a vivi tradizions che in buine part a son ancjemò sintudis, no cate dutis lis dificoltâts, par condividi ricuarts dal passât ma soredut par confrontâsi su azions pussibilis pal avignî.
◆ Par chel che al inten l’aspiet tecnologjic, invezit, chescj events a son stâts regjistrâts, di mût di cjapâ sù lis impressions di bande dal public, che ta cualchi câs al jere stât ancje atôr dai documentaris dal font Pellis-Ciceri. “A Lucinins, par contânt une, al jere in sale ancje chel che tal filmât al picjave la bandiere parsore dal arbul dal Mai. E je stade ancje une biele maniere par tornâ a dâur vôs ai protagoniscj di chei videos”.
◆ I documentaris a son stâts insiorâts cun ripresis fatis di pueste e cui intervents cjapâts sù sul teritori vie pai incuintris di restituzion. Il risultât finâl al è stât presentât a Udin, li dal Museu Etnografic dal Friûl, cun intervents di bande dai curadôrs e, trai i tancj, ancje dal professôr Gian Paolo Gri e dai rapresentants des stessis comunitâts interessadis di chestis tradizions.
Par cumò, i videos a restaran a disposizion dal public di Palaç Giacomelli fin ai 6 di Novembar, ma, come che al garantìs Marco D’Agostini, “si podarès lavorâ ancjemò tant parsore di chescj materiâi, sedi pe cualitât des ripresis, sedi pes ispirazions che al ufrìs il mont che ur sta daûr”.
Un mont che al va indevant a inmagânus inmò in dì di vuê e che a ducj noaltris nus tocje il compit di puartâlu indevant intai nestris avignîs. ❚