VIERZIDURE – I furlans devant de imigrazion

Miârs di personis in chescj mês a bandonin i Paîs dal Nord Afriche lant a cirî pâs e progrès in altrò. A rivin in Italie, ma il lôr intindiment nol è chel di fermâsi chenti. Lu àn mostrât a clâr ancje chei 46 tunisins che a son rivât, puartâts dal Stât, a Lignan: stant che a vevin il permès di permanence in man, che ju lasse libars di movisi, scuasit ducj si son fermâts tai ambients de Getur par cualchi ore e po a son partîts, cirint la strade de France. Dut câs, ancje chenti no son mancjadis peraulis fuartis di bande di cualchi fuarce politiche, insiemi cul sproc: “No ju volin”. Ce staial mudant te capacitât e volontât dal Friûl di dâ il bon acet ai forescj? La fevelade cul diretôr de Caritas di Udin, pre Luigi Gloazzo, e partìs propit di cheste domande.
Diretôr, staial pardabon cambiant il mût di resonâ dai furlans in cont di bon acet?
«Cence altri. Par vie che la sensibilitât e je une component fondamentâl dai ategjaments. Che a son dâts di tantis robis. Magari che a fossin simpri fîs dai valôrs. In realtât a àn une vore di emotivitât intor. In dì di vuê, o crôt che la culture dal popul e sei plui determinade de sensibilitât che no dai resonaments.
La culture di vuê e je, sot cierts aspiets, malade, par vie che e fâs de sensibilitât la uniche stele polâr dai siei compuartaments. Une cundizion che e prejudiche la vision di ce che al compâr, di ce che al è su la place dal mont».
Isal cualchi rimiedi?
«Bisugne resonâ. O vin di cirî di capî ce vision dal om e de societât che o vin. E stant che o sin ancje cristians, che a vûl dî insedâsi tal mont cuntune vision che si ispire a valôrs concrets, o vin di tignî ad a ments i contignûts ma ancje il metodi, tant a dî cemût che Crist al à vivût ce che al à dit».
Tal concret, cun chestis fondis, cemût si puedial frontâ in maniere corete il fenomen de imigrazion?
«Dispès si resone cjalant cheste int come che e fos miserabile, come che e vignìs a domandâti la caritât e vonde. Si dismenteisi che a son personis come nô, che a àn ancje lôr une cundizion fondamentâl di fîs di Diu. Ma i cristians, prime de lôr sensibilitât o dal lôr tornecont, a àn il comandament. Tant a dî, o vin une cundizion di vite sociâl che no simpri o rivìn adore a capîle, a governâle. O vin ancje emergjencis, ma in chestis vino di lassâsi cjapâ dome des nestris pôris o vino ancje di riferîsi ai grancj valôrs che a àn sostignût i popui fintremai cumò? Eco parcè che o disìn che il Vanzeli no je une pirule che tu glotis e che ti risolf dut».
I isal mai capitât di sintî a dî
“no ju volin”?
«Sigûr. Ma no àn coragjo di mostrâsi e di fâ un resonament su chestis robis, par vie che a son dominâts dal fastidi che e cree la television. Dal fastidi di vê il neri che al ven a vendi cjalcins che a ti no ti coventin. Un fastidi che, invezit di puartâ a une riflession, nus met devant dai voi une palandrane. Cussì o vin ancje predis che, di front di chescj fenomens, a disin: “o capìn dut, ma a àn di stâ a cjase lôr”. No rivin adore a rindisi cont che o sin di front a une cundizion gnove de umanitât e ancje de nestre societât».
Dut câs il fastidi al è reâl.
«Sigûr, ma si à di impegnâsi a capî.
Di front a chescj forescj si à di domandâ: “cui sêstu”, “ce fâstu”, “cemût mai rivistu achì”, “cui ti aial puartât”. Domandis che ti fasin capî cemût che cheste int di une bande e je dentri une necessitât di sorevivi e di chê altre e pues jessi dentri di un sfrutament».
E une volte capît?
«Se par câs nol è pussibil inserîju tal nestri mont, si varà ancje di dî che achì nol è puest par ducj. O ben che ancje lôr, se a intindin di restâ, a àn di cirî di inserîsi intune societât che a àn cjatade e che e ven prime di lôr. Jo no ur dinei lis dificoltâts dal inseriment, ma no ju trati nancje mâl. E po une altre precisazion: la plui part dai imigrâts no passe pe Caritas. E je int sane, che e cjate lavôr, che e je studiade, che e à une rêt di parincj e amîs che ju inserissin tal mont dal lavôr. Il fenomen al è cussì grant che chei che a son vignûts dîs agns indaûr ae Caritas cumò a àn ancje une impresute e a judin i lôr conazionâi. Juste chel che al sucedeve une volte cui nestri emigrants».
Antonella Lanfrit