Sfuei Mensîl Furlan Indipendent
Archivi de Patrie

VIERTIDURE – La identitât ae fonde di un svilup diferent

............

Al difint i interès economics e professionâi dai lavoradôrs de Val di Aoste, tignint cont de lôr specificitât culturâl e linguistiche. Di sessante agns, di cuant che al è nassût. E je cheste, la afermazion di une proprie identitât, il valôr zontât dal Sindacât autonom valdostan dai lavoradôrs, organizazion sindacâl confederâl che e à cetant pês te realtât sociâl e economiche de Vallée. Dal 2000 al è rezût di Guido Corniolo.
Segretari, cemût rispuindino lis nazions cence stât ae crisi e ae globalizazion?
«Une rispueste e je la nestre. Vint un reon dai dîs decims di dutis lis acisis che o paìn, a son grandis pussibilitâts di investiment public a pro de industrie, de agriculture, dal terziari avanzât, dal turisim. Par esempli, i implants a cuarde a àn fuarts contribûts che a permetin di vê struturis competitivis a nivel internazionâl. Ciert, se o cjalìn ae Sardegne – li che e je une assence scuasi totâl de Regjon sul tiessût economic, cul conseguent impauriment des risorsis economichis de isule –, nancje il statût di autonomie al pues compensâ lis pierditis di un marcjât globâl che nol cjale in muse nissun».
Un marcjât li che i piçui a socombin. Fale che…
«… a pontin suntune sisteme economic di grande cualitât. Par esempli, il setôr vitivinicul, in Val di Aoste, al è stât rinfuarcît un grum. A son 500, 600 lis personis che i lavorin, cun grancj risultâts. Cumò o varìn bisugne di un gnûf plan di svilup industriâl, li che i bêçs publics a sostegnin la capacitât di competizion traviers di ricercje e inovazion. Chest al vûl dî puartâ la bande largje in regjon – tant che o stin fasint –, meti in pîts filieris agriculis che a svilupin il teritori de mont. E mantignî la mont al vûl dî ancje mantignî su chel teritori une schirie di servizis, massime chei scolastics e sociosanitaris. Vuardâ lis piçulis comunitâts de mont al coste un grum (il 25 par cent di plui che a Torin), ma al à un significât culturâl impuartanton, di conservazion de identitât».
In cont di chest, tant che in Friûl-Vignesie Julie ancje in Val di Aoste si fasin pôcs fîs. Cemût si trasmetie la identitât culturâl di un popul se no je plui la gjenerazion pronte a dâi acet?
«Al è un grant dileme. E je, dal sigûr, une cuestion di civiltât. Al covente un gnûf model di svilup sociâl, che al tegni cont de nestre identitât, e che si fondi suntune solidarietât tra gjenerazions, viert ancje ai imigrâts. Un model di svilup sostignibil là che lis risorsis a son metudis tai setôrs che a dan plui libertât e democrazie aes personis, aes comunitâts».
Cualchi esempli?
«La Regjon Val di Aoste e à cuistât dighis, bacins, centrâls idroeletrichis, gjestîts de Compagnie valdostane des aghis. O consumìn un cuart de energjie produsude, che e je energjie nete, il restant lu vendìn. Clâr che no pensìn di fâ une centrâl uniche par dute la Val, parcè che il model di svilup che o vin tal cjâf, jo e il gno sindacât, al à di produsi lavôr, ma no a spesis dal teritori. Si àn di doprâ lis gnovis tecnologjiis, che a son, juste apont, democratichis. Fâ une cjase autonome dal pont di viste energjetic e je une sielte democratiche di gjestion. No fâs dipindi di une tecnocrazie, che e à sburtât a pro des multinazionâls, di une politiche dal consum pal consum e nus à fat indebitâ par mantignî un sisteme drogât».
Ma si staie lant in cheste direzion?
«Cun grande dificoltât. La nestre autonomie no je stade buine di produsi un model di svilup diferent di chel de Regjon Piemont, tant par fâ un esempli. A son plui risorsis, che a son stadis dadis fûr in ducj i setôrs; e je mancul puaretât, al è un tas di disocupazion metât di chel talian, ma la disocupazion e je istès».
Fevelâ di autonomie intun moment di crisi nol è facil. Lis Regjons autonomis a son viodudis tant che privilegjadis.
«Di cui che nol cognòs il vêr significât de autonomie, ven a stâi une ridistribuzion des risorsis produsudis a ducj chei che a vivin sul teritori. E je vere che o vin un belanç cetant siôr, ma chi il Stât nol spint un euro. La scuele e je dal dut a caric de Regjon Val di Aoste – nus coste 250 milions di euros al an –, tant che la sanitât – par un cost di 300 milions di euros al an -; a caric de Regjon a son ancje Pra, archivis, traspuarts… Il cuarp forestâl al è regjonâl. O vevin un belanç di 1700 milions di euros, cumò al è di 1500 (200 a son lâts pal pat di stabilitât). O vin simpri vût belançs in paritât e o vin cuistât cetantis struturis: de Compagnie valdostane des aghis al casinò di Saint-Vincent».
I coscj dai servizis ju paie la autonomie. Cemût si inserissie cheste autonomie tal contest european?
«Cence problemis. Si à di lâ viers une Europe des regjons, no plui dai Stâts. Une Europe dai popui, no des multinazionâls. Lis lidrîs, lis identitâts diferentis, lis autonomiis a son une ricjece pe Europe. A son ae fonde di chel model di svilup diviers che o disevi».
Che al passe pal federalisim integrâl, pe solidarietât identitarie.
«Pal Savt e je la strategjie juste par armonizâ situazions cetant diferentis intune societât gnove, che e viôt i rapuarts tra i popui e l’ecuilibri dai lôr interès e de lôr identitât su la fonde de cooperazion. Tai prossims decenis, ancje in Val di Aoste, o varìn une societât multiculturâl. Za in dì di vuê il 20 par cent dai fruts che a van a scuele no son valdostans. Lis diferencis ciert a puedin dividi, ma dome se no san e no vuelin ricognossisi in maniere reciproche e cressi insiemi». ■
Erika Adami

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +