VIERTIDURE. La arcidiocesi di Udin e propon la “Provincie dal Friûl”

“Une Provincie dal Friûl in lûc di chês di Udin, Gurize e Pordenon”, inte forme di une “realtât istituzionâl gnove e policentriche che e nassi su la fonde di un pat teritoriâl”, clamant a “element storic unificant lis stessis lidrîs de Glesie e dal Patriarcjât di Aquilee”. E po la citât metropolitane di Triest e la conferme de unitât de Regjon, cun funzions di “preminence e rilevance”. Ai Comuns, “imponi la Union par dâ insiemit i servizis”, ma salvâ “la lôr rapresentance democratiche”. Tant a dî che a àn di restâ i municipis, ancje se semplificâts.
E je cheste, in struc, la propueste di riforme istituzionâl presentade dal setemanâl de arcidiocesi di Udin, “la Vita Cattolica” par vôs dal so diretôr, Roberto Pensa, te audizion de comission speciâl metude sù tal Consei regjonâl par rivâ a une leç di riforme.
Une propueste che Pensa al spieghe su la fonde di principis de Dutrine sociâl de Glesie: sussidiarietât, ben comun, partecipazion e solidarietât.
Par chel che al rivuarde la “Provincie dal Friûl”, il gjornâl al specifiche di no intindi un “Grant Friûl”, ma un gnûf ent provinciâl “dulà che no dut al è concentrât tal cjâflûc, ma dulà che, par esempli, l’assessorât ae Industrie si met a Pordenon, chel de Culture a Gurize, che de Mont magari a Tumieç”. Par il cjâflûc, la propueste di Aquilee, tant che citât che e rapresente dal pont di viste identitari dut il Friûl.
In Friûl-VJ, componût di dôs realtâts culturâls, sociâls, economichis, sociologjichis e linguistichis un grum diferentis, al zonte Pensa, pe part furlane “e reste fondamentâl” la presince di un ent di largjure che al coordeni lis competencis parsore dai Comuns e par progjets di svilup teritoriâl.
Un progjet che, al specifiche il diretôr, al puarte cun se “il superament di ogni ipotesi di rompi la Regjon” e anzit “l’impegn a superâ lis difarencis teritoriâls, economichis e sociâls, che cumò a interessin sore il dut la mont e chês che a stan patint la deindustrializazion par colpe de crisi e de globalizazion”. Un compit che al à di jessi in prin de Regjon, par mieç des leçs e des sieltis di finanziament des autonomiis locâls, governant i ecuilibris teritoriâls.
Oltri ae part propositive, la Vite Catoliche e met in evidence lis “impostazions che a straviin” la discussion che si è inmaneade ator de riforme istituzionâl.
Une discussion che e je nassude su la presse dai proviodiments dal Guvier talian e no, “come che si sperave di timp”, tant che “espression de Specialitât regjonâl, par dâ a la nestre comunitât regjonâl lis rispuestis istituzionâls specifichis che e si spiete”.
Inoltri, la Vite Catoliche e considere che cun “grande superficialitât” si sosten che i “ents locâi plui grancj a son bogns di otegni plui eficience. «Une dogmatiche fiducie te economie di scjale – al dîs Pensa – che no je sostignude ni des plui modernis teoriis di organizazion ni de osservazion de realtât».
Ultin cantin, ma no par impuartance, il fat che di front ai atacs aes Regjons speciâls si cîr gnûfs motîfs par dâi fonde ae autonomie dal Friûl-VJ. «La uniche vere reson di fonde de nestre autonomie, a part i motîfs gjeopolitics origjinaris che storichementri no son plui – al sotlinie Pensa – e je la fuarte presince des minorancis linguistichis e culturâls furlane, slovene e todescje». Chest element nol è “dome un fat dal passât, ma un element che al prodûs doman. Cun di fat, al è a dimplen ricognossût e valorizât ancje de Union europeane”, al siere il diretôr de Vite Catoliche. ■
Antonella Lanfrit