VIERS IL FRIÛL. L’an bon par Sapade?

Te lente e ingredeade machine legjislative taliane al tocje spietâ plui o mancul un an par viodi che une leç e continue tal so iter burocratic. Al è il câs di chê scrite des dôs senadoris, Isabella De Monte dal Pd e Raffaella Bellot de Leghe, par tornâ a puartâ Sapade-Plodn in Friûl.
Si impensaran i letôrs de Patrie che propit un an za fa la Comission bicamerâl pai Afârs Costituzionâi dal Parlament di Rome e veve votât a pro dal passaç di regjon pal comun dal Cjadovri traviers di une leç ordenarie, e duncje in maniere plui svelte rispiet a ce che e proviodarès une leç costituzionâl. Un risultât che al veve fat tornâ il bon umôr ai citadins sapadins, dal 2008, in spiete di vê ricognossût il risultât dal referendum. Po dopo par dut il 2014 pocjis gnovis. Fintremai a rivâ ae fin di Novembar cuant che inta 5e Comission permanente dal Senât, chê dedicade al Belanç, il senatôr Santini dal Partît Democratic, relatôr di maiorance, al à ilustrât il test unificât dai doi dissens di leç, segnalant che cumò al coventarès ancje une “relazion tecniche verificade in maniere positive de Resonarie gjenerâl dal Stât, cul obietîf di verificâ lis conseguencis pe finance teritoriâl” cul cambi di Regjon. In struc i resonîrs a àn di mostrâ i numars di ce che al mudarès tai conts de nestre regjon cul rientri di Sapade. Dute la comission e je stade dacuardi cul relatôr e di bande sô il sotsegretari Paola De Micheli, presinte ae riunion, si è impegnade a recuperâ cheste relazion tecniche tai “timps plui svelts pussibii”. Ai sapadins nol reste che continuâ a tignî dûr, sperant che chest 2015 al sedi pardabon l’an just par distropâ la butilie di spumant. ❚
David Zanirato