“Viandemecum”: istruzions par cjaminâ

Essenzialitât: e je la regule auree dal lâ a pît.
La preparazion dal sac e lis scarpis a son lis primis sieltis che si fasin cuant che si à di partî: che al sedi Sant Jacum di Galizie, Rome, o la Mont Sant dal Lussari che e siere il Troi di Aquilee.
Intal sac al va dome il necessari: preparait la robe sul jet di cjase domandantsi “Coventie? Puedio lassâle a cjase”? Un chilo di masse al pues someâ robe di pôc, ma dopo cualchi ore che o cjaminais si rindarês cont di ce che o podês regalâ par slizerî la cjame su pe schene.
Al è impuartant no sbaliâ scarpe: nol vûl dî confondi la çampe cu la drete, ma cjoli une scarpe che ti fâs mâl tai pîts, ti fâs vignî lis vissiis e ti inflame lis articolazions. Duncje sielzi cun atenzion ce meti tai pîts, scarpis e cjalçuts comprindûts.
Un ultin consei, preparâsi ben prime di partî: un bon alenament al zove par frontâ tancj km, ma nol baste. Partî par un pelegrinaç al significhe informâsi, cognissi i puescj dulà che si cjaminarà, in sostance “scomençâ a cjaminâ prime di partî”. Par chest une buine vuide, consultâ i sîts internet o cirî cualchi forum a permetin di jentrâ tal spirt just e evitâ sorpresis. Cui che al à fat il Camino de Santiago nol à vût problemis cu la segnaletiche, struturade e frecuente, ma se o vês voie di frontâ cjamins zovins come il Cammino Celeste/Troi di Aquilee e je buine regule visâ i referents. Cuant che o decidês di partî, telefonait (i recapits a son sul sît) visant in ce zornadis che o pensais di rivâ a ogni tape. Cussì o permetarês a cui che al à di dâus ospitalitât di fâus gjoldi pal miôr cheste esperience profonde. (Chr. Rom.) ❚