Venditôrs di fum

Discjamâ i problemis su la int, invezit di cjatâ soluzions cun jê. Al è chest il metodi “made in FVG” che al cjate une dimostrazion plastiche in cheste cjartine; culì si cjatin dome un pocjis des situazions critichis che intai ultins mês a àn savoltât tantis comunitâts de nestre tiere. La int si è viodude colâ jù dai cops progjets, infrastruturis, proviodiments che nissun al à mai spiegât ni fat viodi cuntun confront sclet e viert intes lôr implicazions positivis e negativis. Dut fat di scuindon fin cuant che si pues… Ma prin o dopo, se no si sa fâ ben rodolâ i fîi, il glimuç si ingrope, e al ven fûr dut un gredei che po al devente dificil, e forsit impussibil, disberdeâ.
◆ I furlans a passin par “salts, onescj, lavoradôrs”, ma inte lôr storie a àn plui voltis praticade la art dal riviel cuant che la misure si è incolmade. Nol covente tornâ indaûr al 1511: baste visâsi des tendopolis dal taramot che a son ancjemò un esempli di cemût che la int e à volût dî la sô “Pa sopravivence, no pa l’anarchie”, come che al à spiegât Igor Londero intal plui biel libri jessût sul Orcolat e sul so impat su la comunitât. Cuant che al è someât clâr che si voleve passâ parsore de volontât di cui che al jere leât al so paîs, la int si è mote, e i à fat cuintri a cui che al tentave di tibiâ i siei dirits.
◆ La lezion di in chê volte no je dismenteade. Cuant che la int e capìs che ciertis iniziativis a son puartadis indevant pal interès dome di cualchidun, ma invezit a podaressin vê un impat su ducj, si môf e no sint resons. Comitâts, petizions, manifestazions: la partecipazion e je fuarte e la int no mole e e fâs pôre a chei che a paronin sperant tal cidinôr e te indiference di une masse massepassude. Alore al è ancje avonde ridicul assisti ai balets des declarazions dai sorestants che si platin daûr de burocrazie che lôr stes a comandin o a disin che e je Rome che e sburte par imponi une decision che lôr stes a àn a dilunc cirût di fâ lâ indenant. Al fâs ridi, ma al ven di vaî. Parcè che intant che la int furlane e passe il timp a difindisi di menacis mascaradis di vantaçs, il timp al passe, la popolazion e cale, i zovins a tornin a jessi libars di scugnî lâ e par cheste tiere nissun al è daûr a predisponi une strategjie pal avignî dal Friûl.
◆ Ce vocazion varessie di vê cheste tiere doman? La rispueste che a dan i podês finanziaris si lei clare intes vicendis come chê dal implant Metinvest-Danieli che al è stât ipotizât inte zone industriâl de Ausse-Cuar. La Regjon, dopo che par mês si è platade daûr di un dêt, devant di passe 24 mil firmis e e je lade a cessecûl. Ma la int no si fide plui, parcè che si fevele za di “comissaris” di Rome che a podaressin adotâ proceduris di urgjence. Dopo jessi stade par un secul “la Sentinele” de Patrie sul confin todesc e slâf, paralizade des “servitûts militârs”, cumò se i furlans no cjatin di bessôi une altre strade alternative ur tocjarà di pleâsi a altris servitûts: industriâls, economichis, energjetichis. Mai parons, simpri sotans: cussì ju vuelin, chei che a comandin inaltrò cu la poie dai çambarlans di chenti.
◆ Par chest no si à dismenteâ la lezion dai vons: ai vendidôrs di fum, plui o mancul tossic, no bisugne fâ mai il plasê di pleâsi cence scombati e cence fâsi sintî. Ancje parcè che dispès, ae fin, la uniche vôs che e reste e je il çoc di chei sorestants che a van a sbati cu lis lôr sigurecis cuintri de volontât dai furlans che no si rindin. ❚