Universitât e Fondazione Friuli dutun pe promozion dal savê

La Universitât dal Friûl e Fondazione Friuli a àn rinovade la convenzion pe poie de internazionalitât, de multidissiplinaritât dai dotorâts di ricercje “di frontiere”, e de inovazion in agriculture. Si trate di un acuardi che al previôt 800 mil euros di contribût tai progjets cuntune validât di un an: la convenzion e je stade firmade tal palaç Antonini-Maseri a Udin dal retôr de Universitât Roberto Pinton, e dal president de Fondazione Giuseppe Morandini. «In trente agns di ativitât de Fondazione – al à dit Morandini – il sostegn ae Universitât nol è mai mancjât. In chest periodi o vin tirât sù insiemi tancj pilastris dulà poiâ la cressite sociâl, economiche e culturâl dal Friûl. Cumò o ’nt zontìn altris trê che a vuelin creâ la discontinuitât che e covente par frontâ il contest inedit che o vin denant». I trê pilastris de convenzion a son la internazionalitât, sedi par chel che al tocje la docence che lis esperiencis dai students tal forest, la multidissiplinaritât cui dotorâts di ricercje “di frontiere”, e la microvinificazion a sostegn de ativitât intense te ricercje puartade indenant dal Ateneu ta chest cjamp (dome tal 2021 a son stadis fatis 105 provis sui vignâi sperimentâi). A son confermadis diviersis liniis di intervent: si previodin 20 borsis di studi pai students tes laureis magjistrâls inte suaze di Uniud Lab Village, e Lean Experience Factory (Lef) pal inseriment di laureâts cun competencis su digjitalizazion dai procès produtîfs tes aziendis dal teritori. Sul front de didatiche al è il sostegn de Fondazione al cors trienâl in Filosofie e trasformazion digjitâl. Altris jutoris a garantiran la continuitât in progjets za inviâts, tant che il sostegn ae Scuele Superiôr, i finanziaments pal cors trienâl di inzegnarie industriâl pe sostignibilitât ambientâl. Po a son ancje i contribûts par Erasmus e tirocinis, e chel pe campagne di sgjâfs archeologjics in Kurdistan, cence dismenteâ lis risorsis di promozion pai gnûfs iscrits.
◆ «O ringraciìn – al à dit il retôr de Universitât Pinton – la fondazion par vê rinovât cheste poie impuartante: la atenzion pe formazion e conferme la condivision di obietîfs comuns tant che l’invistiment te cognossince e tes zovinis gjenerazions, essenziâi par podê pandi miôr lis nestris potenzialitâts e par contribuî ae cressite socioeconomiche dal teritori e ae valorizazion des sôs peculiaritâts». ❚