Une filiere locâl pal pan: “Pan e farine dal Friûl di Mieç”

Un pat fra i Comuns par judâ i produtôrs di forment a stâ sul marcjât e i citadins a mangjâ pan plui bon, san e soredut furlan. Al è chest il messaç dal Progjet “Pan e farine dal Friûl di Mieç”, batiât intune serade une vore partecipade al Teatri Clabassi di Sedean dal climatolic Luca Mercalli, president de Societât Meteorologjiche Taliane e muse une vore cognossude pe sô partecipazion fisse al program di Fabio Fazio “Che tempo che fa”. Mercalli al à preseât une vore la iniziative dai Comuns di Basilian, Flaiban, Merêt e Sedean che, adun cul Forum pai bens comuns, a pontin a deventâ un vêr e propri “Distret di economie solidari”.
UN PAN PLUI ONEST_ L’obietîf al è puartâ intes cjasis un pan plui onest, che al crei economie sul teritori intal non de cualitât dal prodot e dal ambient. E larà par chest valorizade une filiere locâl, sostignibile e solidarie de farine di forment. Lis aziendis agriculis a produsaran varietâts specifichis e autoctonis, secont tecnichis agronomichis compatibilis cu la nature, cence trataments che a vedin impat su la salût des plantis e di cui che lis mangje; duncje i mulins presints sul teritori a masanaran il lôr forment, cence miscliçâlu cun chel di altris produtôrs; i fornârs a dopraran cheste farine par fâ pan che, midiant de individuazion des diviersis fasis e de trasparence intal so procès di produzion, al sarà pardabon furlan al 100 par cent. Anzit, chilometris zero.
PAT SIMPRI VIERT AES ADESIONS_ Il Pat al è stât sotscrit dai sindics ma ancje i agricultôrs e i centris di racuelte, i mulinârs e i pancôrs, e ancje i grups di citadins che a comprin in maniere solidarie si son impegnâts a dâ un sburt a cheste gnove maniere di intindi il rapuart jenfri teritori e economie. Il Pat al è stât lassât viert e ducj chei che no lu àn ancjemò fat a podaran simpri aderî.
Lu à capît ancje l’assessôr regjonâl ae agriculture Cristiano Shaurli che al à notât cemût che cheste iniziative si insuazi in maniere perfete inte filosofie di promozion de cualitât agricule che la Regjon e vûl promovi tal gnûf Plan di Disvilup Rurâl in armonie cui criteris europeans ❚ ✒ W.T.