Une aziende agricule in mont che “A ven a fâsi”

No mancjin bielis novitâts te mont cjargnele. Cheste volte o sin in malghe Daude, indulà che Sara Piazza, une zovine di 30 agns, si è trasferide cu lis sôs 50 vacjis par passâ la stagjon estive. “O sin un pôc tart par vie che la burocrazie nus à ralentâts, ma o speri cu la prossime setemane di scomençâ a fâ la scuete e il formadi”, nus dîs Sara, ai 20 di Lui.
◆ A 16 agns Sara e à molât la scuele par lâ a vore. E à gjestît par 12 agns un bar che cul Covid al è stât sierât. “Intun ciert sens – e dîs – o vevi bisugne di distacâmi de int dal bar… za fa sîs agns o ai viert la aziende agricule e o ai pensât di clamâle “A ven a fâsi” propit parcè che o soi partide dal nuie e par câs. Il gno om al voleve cjoli cjavris, jo un pony. Dopo o vin vude la ocasion di cjoli trê vacjis di un che al jere daûr a sierâ la ativitât, e di chel moment mi soi inamorade di chestis bestiis. Prime di vignî in malghe o vevi dome vacjis di cjar, une sielte vincolade parcè che il camion dal lat nol rivave inte stale che o vin a Cjaçâs. Cumò in malghe o ai ancje vacjis di lat. Fin cumò no podevin permetisi di cori ancje par puartâ il lat, stant che il gasoli al costave cuasi 2 euros al litri e il lat 0,50. Chest an, si cambie! Par tornâ a Cjaçâs si sin organizâts cun altris cuatri stalis che a puartin il lat te latarie di Enemonç. Ur domandìn di puartânus ancje il nestri lat: lôr lu puartin une setemane parom, e nô ur paiarìn il gasoli. Pal moment la latarie di Sudri no je intenzionade a vignî a cjoli il lat ca di nô, e duncje tocje organizâsi.”
◆ Sara, cul om e cui doi fîs piçui, e je a stâ a Cjanive di Tumieç, a 10 minûts di machine de stale “ma – e conte Sara – e je intun puest avonde fûr di man, e al tocje lâ sù cuntun mieç piçul parcè che se no no si passe jenfri lis cjasis che a son prin de stale. Ogni robe e risulte complicade, ma jo no moli! Ancje la burocrazie e je dificil di stâi daûr, cumò al è dut eletronic: chê altre dì o vevi di vendi dôs vacjis e no mi risultave sierât un tratament fat tal 2020… par chest no podevi vendilis… a fuarce di vitis o soi rivade insom… Se dopo lis vacjis a risultin a passonâ, o scuen impensâmi di compilâ un model almancul cuatri dîs prin de vendite: model che al à dopo di jessi validât… in sumis, al è dut avonde complicât par un che al scuen lavorâ ducj i dîs dal an!”
◆ Vie pal Invier, la svearine di Sara e sune aes 5.30. Tor lis 6,15 e fâs jevâ i fruts, ju sisteme pal asîl e ju lasse li di sô mari: jê e va inte stale fintremai aes 10, e dopo e torne des 4 dopo misdì aes 7 di sere.
◆ “La idee e je che il prossim an ancje il gno om mi dedi une man: cumò al lavore in fabriche a turni a Osôf e mi jude cuant che al pues… in malghe al ven cuant che al cumbine cui turnis. Pal moment o soi dome jo cui fruts” e dîs ridint Sara, a dimostrazion che di zoventût coragjose e plene di voie di fâ a ‘nd è ancjemò.
◆ Par restâ inzornâts su la sô ativitât o podês lâ te pagjine facebook: https://www.facebook.com/avenafasi ❚