Un studi USA: i fruts bilengâi a àn plui snait

I fruts che a fevelin dôs lenghis, o chei che a vivin intun ambient li che si ‘nt fevele plui di une, a rivin a capî miôr lis situazions ator di se, e chest ju puarte a vê plui capacitât di aprendiment e plui facilitât di comunicazion.
Al è il risultât di un studi de Universitât di Chicago, publicât su la riviste Psychological Science te metât di Mai, davuelzût suntun grup di fruts dai 4 ai 6 agns, dividûts in 3 categoriis: chei che a fevelavin dome une lenghe (inglês, in chest câs), chei che a ‘nt fevelavin une ma che in famee a ‘nt sintivin ancje altris, e chei che normalmentri a ‘nt fevelavin dôs.
Stant che i fruts a jerin piçui, i esperiments a son stâts une vore sempliçs: dut câs, e coventave logjiche e un fregul di intuizion.
Chei che a fevelavin dome une lenghe a àn passât il 50% des provis. Chei usâts a sintî plui lenghis a son rivâts al 76%, e miôr ancjemò chei bilengâi.
Il Professôr Boaz Keysar, psicolic e espert di comunicazion che al à vuidât il studi, al dîs che la inteligjence emotive e je impuartante tant che la capacitât di capî e di imparâ, par un frut, e che fevelâ plui lenghis al jude. Un grum.. ❚
✒ Radeschi