Di plui setemanis sui media slovens si cjacare avonde di Dušan Smodej, un operadôr culturâl e artistic di Novo Mesto. Su internet, di fat, a son saltadis fûr plui testemoneancis di bande di ipotetichis vitimis di violence sessuâl. Ma ancje ipotetics leams di Smodej cun ambients politics. Intun Stât piçul tant che la Slovenie, al è cetant facil vê cualchi contat cu lis personalitâts politichis di Lubiane.
◆ Te trasmission televisive slovene Tarcˇa, al inizi di Setembar, Dušan Smodej al à dit di no jessi stât inmò sintût de polizie par ce che al tocje ipotetics atacs sessuâi descrits sul profîl Instagram Proti nasilju Dušana Smodeja (par furlan, “Cuintri la violence di Dušan Smodej”). Dut ce che al sa su chest, al è ce che al à let sui media.
◆ Tal moment che si scrîf chest articul, daûr de redazion de trasmission Tarcˇa, e je concrete dome la testemoneance de amie di une des vitimis ipotetichis. Cheste amie e conte che, daspò di un after party, la vitime e varès volut lâ a cjase a durmî, ma Smodej al varès volût a ducj i coscj vê un rapuart sessuâl cun jê. Al varès corût daûr dal so taxi, no le varès lassade jentrâ in cjase, le varès pacade e violentade tal so jet. La redazion de trasmission televisive no à rivât adore di fevelâ cu la vitime.
◆ Smodej al à dineât di vê mai obleât cualchidun a vê rapuarts sessuâi e al à ametût di vê mandât messaçs a sfont erotic a fantatis, cun descrizions di fantasiis erotichis. Tra i amîs di Smodej al jere Roman Uranjek, un famôs pitôr e artist sloven, che al è muart ai 20 di Avost. La dì prime che al murìs, Smodej al veve fevelât cun lui e Uranjek i veve conseât di lassâ par cualchi timp la Slovenie.
◆ Cuintri Uranjek a jerin stadis presentadis dôs denunziis e daspò de muart di Uranjek nissun al à cjatât il so telefon. Ancje Smodej al varès cambiât telefon.
◆ In Slovenie si fevele e scrîf avonde ancje des tantis cognossincis a nivel politic che al varès vût Smodej, tant a man drete che a man çampe. Daûr di ce che al dîs, la int e varès sierât i contats cun lui.
◆ Par esempli, al varès cognossût il ministri dal Lavôr Luka Mesec, dal partît Levica (Çampe), ma no saressin amîs. Insiemi cuntun amì gjornalist de radiotelevision slovene RtvSlo, Nejc Krevs, Smodej al veve intervistât ancje la ministre atuâl de culture Asta Vrecˇko, simpri dal partît Levica. Le varès incuintrade bielzà prime tai circui culturâi. Smodej al dinee di jessi leât a chest partît. Cul ex ministri pe Conversion digjitâl tal precedent guvier di centridiestre, Mark Boris Andrijanicˇ, a saressin amîs di famee e si saressin cjatâts a cualchi cene.
◆ Di plui bandis e salte fûr la acuse di strumentalizazion politiche di un teme cetant delicât. ❚
Un prin scandul pal guvier sloven
Luciano Lister