✽✽ Nol è par fâmi i fats di chei altris, ancje se o sai benon che ae fin in ogni câs i efiets a saran deleteris ancje pai furlans, ma o crôt di interpretâ un sintiment slargjât e un dubi gjenerâl, domandantmi parcè che a àn fat colâ Draghi. No si trate, che al sedi clâr, di difindi o di meti la stesse maiute dal ex president, di aprovâ o mancul ce che al è stât fat fin cumò di chê formazion di guvier cjaviestre e inaturâl, ma dome di bon sens. Ce vuelial dî cuntune pandemie par nuie vinçude, cuntune crisi energjetiche che di dome anunziade e je deventade invezit presinte in maniere teribile, di une vuere che si strissine aromai di mês e no si viodin soluzions realistichis al orizont, e che e creve chel pôc che al reste di une Europe simpri plui disponibile a declinâsi tant che insiemi di stâts e no di popui? Dulà sono ladis a finîle lis prioritâts tant che chê de difese dal ambient o dal futûr des zovinis gjenerazions? Intun scansel, sorplantadis de logjiche dai partîts e de lôr fam di podê. A cost di ducj i coscj, ancje cuintri i interès de coletivitât, ma difindint vitalizis e prebendis dai atuâi aromai ex onorevui.
✽✽ La dimostrazion palese di cheste volontât e je in cheste leç eletorâl disgraciade che e dismieze la rapresentance popolâr, duncje lis formis de stesse democrazie parlamentâr, in man e in ostaç di listis blocadis des segretariis romanis o milanesis dulà che i interès di corint, di sotanament al leader di turni, a paronin in barbe al rapuart cul teritori.
✽✽ Puar Friûl, ridot dome a serbatori di vôts pai coleçs talians, cence plui vôs in cjapitul par difindi i siei interès, cu lis urnis destinadis dome a une prove, un alenament in viste des elezions regjonâls, dulà che invezit si à vôs in cjapitul, si à il podê di intervignî su la spese corinte, inte gjestion dai milions euros che a rivaran in cheste regjon. Par ce robe e par cui a restin ancjemò tal inciert, cence nissun sfuarç di prospetive, di previsions di plans a medi e lunc tiermin.
✽✽ Al è ancje un altri motîf di disconfuart in chest Setembar des ombris scuris: a diference des passadis politichis talianis, no varìn nancje la pussibilitât di segnâ la nestre crôs suntun partît autonomist. Al jere un segnâl di sperance, confuartât dal risultât storic otignût dal Pat pe Autonomie, cu la elezion di doi conseîrs aes consultazions regjonâls sucessivis.
✽✽ Al moment no sai se chest al sedi sucedût par dificoltâts tecnichis o par sieltis politichis. E il no savêlu mi avilìs tal stes mût dal no podê esprimi dute il gno riviel pal stât di robis presint, ancje se dome intune urne. ❚
