Un imni pe Patrie

La Patrie dal Friûl e vûl il so imni, come ogni patrie che si rispieti. O vin la lenghe, la fieste, la bandiere o miôr lis bandieris, di pâs e di vuere. Al mancje l’imni, di cjantâ ducj insiemi intes ricorencis e no dome. Une musiche e peraulis rapresentativis, indulà che ducj i furlans a puedin ricjatâsi. Il discors al jere vignût fûr l’an passât, cuant che midiant de rubriche “Scremaduris” sul Messaggero Veneto al jere partît un sondaç par individuâ la cjançon plui rapresentative dal Friûl, in viste di un imni vêr. E veve stravint “Stelutis alpinis”, seconde “Scjaraçule maraçule”, tierce la vilote “Tu tramontis”. Ma no si trate di imnis.
E alore cumò al partìs il bant, anunziât in ocasion de 940me Fieste de Patrie dal Friûl, domenie ai 2 di Avrîl dal 2017 a Sapade. A bandî il concors al è l’Istitût Ladin Furlan Pre Checo Placerean, par une gare di composizion vierte a ducj.
Il componiment al à di jessi par côr, armonizât di dôs a cuatri vôs, e orchestre classiche. Il test par furlan al pues jessi cjapât sedi di un lavôr bielzà esistent, sedi invezit di un dut gnûf. Nol pues però jessi la traduzion di un test in altre lenghe, e al à di jessi scrit rispietant la grafie uficiâl. Bisugne ancje garantî il rispiet dai dirits di autôr, tal câs, e cedi al Istitût organizadôr ogni dirit di produzion, difusion, regjistrazion, parcè che si vûl spandi il plui pussibil l’imni vincidôr, ancje midiant de realizazion di un cd, cu la part vocâl e cence, par permeti a ducj di cjantâlu in maniere libare.
Bisugne inviâ la opare dentri dai 20 di Zenâr dal 2018. Lis modalitâts e dutis lis regulis a saran publicadis sui varis sîts internet di promozion de lenghe e de culture furlane, come www.istitutladinfurlan.it, www.arlef.it , e ancje nô no mancjarìn di furnî ducj i detais di cheste iniziative. Une zurie specializade, componude di cinc esperts tai cjamps de musiche, de lenghe e de storie furlane, e valutarà i lavôrs. Un di lôr al fasarà di President e al sarà une figure famose a nivel internazionâl.
Sul plat a son 3000 euros pal imni vincidôr che al vignarà eseguît inte Fieste de Patrie 2019. ❚
✒ Alessio Screm