Sfuei Mensîl Furlan Indipendent
Archivi de Patrie

EDITORIÂL – La propueste autonomiste e tache a dâ fastidi

............


Il destin dal autonomisim furlan al è simpri stât dome un: jessi ignorât dai partîts talians cuant che nol jere calcolât pericolôs, doprât cuant che lu si podeve doprâ, dispreseât cuant che no lu si podeve plui controlâ.
_Intal ultin periodi si disarès duncje che alc tal aiar dal Friûl al à di jessi pardabon cambiât, parcè che i partîts talians a stan scomençant a atacâ in maniere simpri plui dure chei esponents
dal mont politic, in particolâr sindics e aministradôrs, che a son daûr a fâ sintî simpri plui fuarte la vôs di chei che a pensin che l’identitât furlane e la specialitât a sedin valôrs di difindi cul cûr e cu la anime, ma ancje cul cerviel.
_Invezit int che e à vût responsabilitâts ancje di guvier
in cheste regjon, come il conseîr
Luca Ciriani, fevelant de pussibilitât di costituzion di une fuarce autonomiste si sint menaçade: lu à dimostrât atacant la Assemblee de Comunitât Linguistiche Furlane e il president dai siei 102 sindics, Diego Navarria.
Par Ciriani dome chei che a àn un cognon furlan come lui a son in stât di podê dî la lôr su l’autonomie dal Friûl: i “sicilians” come Navarria a àn di stâ dome cuiets a scoltâ i Fratelli d’Italia, che lôr sì a vuelin
il ben dai furlans.
_L’ironie di Ciriani si è indreçade ancje ai sindics dal Pat pe Autonomie. «Dulà jerino fin cumò, intant che la Serracchiani ur disfave i Comuns?» si domande.
Se al ves voie di scoltâle, la rispueste e je clare: a jerin intai lôr municipis a cirî di parâsi dai dams che ancje chei come lui a àn fat aes nestris comunitâts.
Ciriani si dismentee – ma i furlans no – di jessi stât vicepresident de zonte di Renzo Tondo, chel che al diseve «Il friulano è una cazzata!».
_Dulà jerial lui intant che Tondo al firmave cun Tremonti un Pat che al sdrumave la autonomie finanziarie de Regjon?
Par sigûr la Serracchiani no varà fat di miôr, ma almancul e sta cidine pe vergogne. Invezit Ciriani al tabaie: parcè?
_Si sa, la gjaline che e cjante e je simpri chê che e à fat l’ûf.
La conclusion duncje e je dome une: in chest moment tancj sindics, aministradôrs e citadins a àn capît che çampe e drete no fasin (se mai ju an fats) i interès dai furlans. E sul teritori e je daûr a nassi, intune farie politiche simpri plui autonomiste propit parcè che e nas dal bas, une propueste politiche che e tache pardabon a dâ fastidi.
_E je une gnove classe dirigjente vignude su tai municipis a “pan e delibaris”, che aromai e je pronte a mostrâ a Ciriani e ai suoi Fratelli (d’Italia e no dome) di jessi une alternative che no si spavente: ni di front ai siei atacs, ni di front ae prospetive di vuidâ la Regjon. ❚
✒ Walter Tomada

A torzeon pal Friûl / “Der Voschank”, il spetacul des mascaris sauranis

Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +

A torzeon pal Friûl / La maravee di scuvierzi il Carnevâl rosean

Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +