La fieste uficiâl si è fate in Setembar: 40 agns de fondazion dal Fogolâr Furlan di Bollate, citadine di 36.000 abitants su la puarte di Milan. Un Fogolâr che ancjemò al resist, salt. Ma cemût?
«O vin sielzût di evolvisi, no sierantsi inte nestre realtât» mi conte Marco Marcon, ex president dal sodalizi, professôr al Politecnic di Milan «e cussì o vin inviât colaborazions cul Comun e cu lis associazions dal teritori, metint a disposizion la nestre sede par tantis iniziativis, ancje di altris».
La sede dal Fogolâr di Bollate, di fat, e je tant ample, plui di 200 metris cuadris. E je stade volude dal prin president e fondadôr storic, Valentut Toniutti. Cuarante agns indaûr, di fat, viodude la grande imigrazion di furlans a vore tes fornâs di modons tai contors de zone des “Groane”, a nasserin dôs cooperativis, Fogolâr Furlan e Arcobaleno, cun chê di costruî une schirie di cjasis pai furlans. Dentri di chest complès, si à volût destinâ ancje un spazi par cjatâsi intun Fogolâr Furlan.
«O tignìn cors di inglês, di fotografie, un campus estîf pai fruts e un par dâur acet di sabide intant che i gjenitôrs a son impegnâts» mi dîs Marc. «E dopo par Zenâr o vin previodût la partence di un sportel legâl, une scuele di musiche, e ancje la costruzion di une cusine cul fin di fâ cerçâ mangjativis furlanis. Chestis ativitâts si inviin in graciis dal contribût di gnûfs conseîrs dal diretîf, li che o vin un avocat, un architet, e vie indevant».
Chest an, di fat, in Jugn, e je stade rinovade la dirigjence de associazion cuntun gnûf president, Liviano Nodusso, e un diretîf di 11 conseîrs.
«Po dopo, dal sigûr o larìn indevant ancje cun dutis chês altris iniziativis tradizionâls: la fieste di Sante Luzie pai fruts, il Carnevâl par grancj e un pai frutins, la fieste anuâl Fieste de furlanetât, la fieste dai Muarts cu la messe dulà che dopo o ufrìn cjastinis e vin».
Une associazion duncje cetant vivarose, e la sinergjie cul teritori e podarès jessi di esempli pe ativitât di tancj altris Fogolârs ator pe Italie e pal mont.
La sede, viôt il câs, e je in vie Friuli-Venezia Giulia. «Pecjât che no si clami vie Friuli e vonde», i buti la batude a Marc. E cussì, o sierìn la interviste ridint. ❚
Dree Venier