Un coridôr doganâl Triest-Fürnitz

Gruis zalis si drecin tal cîl celest par scjamâ a tiere, a prime viste cence nissune fadie, containers grandonons. Pôcs metris plui in là e ven liberade la cjame de Viking Sea, daprûf dal gnûf terminal de Hamburger HHLA International GmbH. Piçui autos eletrics di mil colôrs di marche Yoyo si movin in mût frenetic intal dulintor. Bisugne fâ daurman, par vie che il puest – stant a ce che e dîs Theresa Kummerow de HHLA International – al è pôc. I todescs no son i unics invistidôrs intal puart di Triest. Jenfri chescj a son – tant che e marche la autoritât portuâl inte persone di Torbianelli – la Svuizare, la Danimarcje, la Ongjarie e la Olande. Ma ancje pe Austrie il puart di Triest al davuelç une part impuartante, al evidenzie il president de Cjamare di Cumierç carinziane Jürgen Mandl intant de visite cuntune delegazion di imprenditôrs di chel Land. Intal avignî Triest al deventarà simpri plui impuartant tant che cjaveç economic pe Austrie par vie che, come che al conferme il stes Torbianelli, dopo dîs agns di tratativis, la strade pal coridôr doganâl Triest-Fürnitz e sarès libare. Chest al vûl dî che la procedure de durade massime di 120 dîs e pues partî e lis autorizazions a podaressin rivâ za dentri di chest an, come che e esulte la aministradore delegade dal Logistik Center Austria Süd di Fürnitz, Julia Feinig. Magari cussì no, a Triest il spazi pal sdoganament al è sclagn par colpe des cundizions particolârs dal teritori e dal paisaç. Fin di cumò il puart al à dislogât une part des operazions di disdoganament intal dulintor. Un doman chest si fasarà a Fürnitz. Cun di plui, in graciis de grande stazion di cjame e spartizion di Fürnitz, Triest al vignarès a cjatâsi sul indreçament Baltic-Adriatic. Pal Logistik Center Austria Süd cheste e je la ocasion favorevule par deventâ un centri impuartant, cun disvilup di insediaments aziendâi e la creazion di 2000 puescj di lavôr, in plui dai 800 che a esistin bielzà.
◆ Intal ultin trimestri, intal puart di Triest a son stadis dispartidis 14 milions di toneladis di marcjanziis (+20%) e mots plui di 200.000 containers standard, e i plans di espansion a cressin in proporzion. Intai agns seguitîfs doi miliarts di euros a varessin di jessi destinâts a un gnûf imbarcjadôr e ancje ae modernizazion di chei che a esistin za, ma ancje ae modernizazion dal puart di Monfalcon, che al fâs part de stesse gjestion.
◆ Intai ultins trê mês pursì 2500 trens a son partîts dal puart (+14%).
◆ Ancje pal puart sloven di Cjaudistrie a vignaran fats grues invistiments: nome intal 2022 si podarà fâ cont su 68,5 milions di euros, stant a ce che al conte il diretôr di chel puart. Di là a partissin marcjanziis di dutis lis cualitâts, fale gas e petroli, e il 38% di chestis a van in Austrie. Intal 2021 a rivarin in puart 656.000 veicui e a vignirin disdoganâts un milion di containers. I numars a fevelin di bessôi par mostrâ l’indreçament di disvilup pal avignî. ❚