Za President de fondazion dal Teatri Gnûf Giovanni da Udine, Tarcisio Mizzau, dirigjent industriâl in pension, al è stât clamât a fâ part dal consei di aministrazion dal Teatri Stabil furlan. “O ai il teatri tal gno destìn” al contave ae “Patrie” agns indaur. “Mê mari di fat e veve la panze cuant che e je lade a teatri, une sere a Bean, a viodi «Il martiri di san Tarcisio», e la creature e à cjapât il non dal protagonist”. Ma di espert di economie Mizzau al cjale al particolâr valôr che al à il teatri par furlan. “La lenghe e je un patrimoni culturâl, une marche. E jo o crôt tes marchis e o sai trop che a valin. Il furlan al è come un biliet di visite, al rapresente la nestre culture».
La operazion dal Teatri Stabil dut câs no conte dome su int di esperience come lui, Lorenzo Zanon, Dani Pagnucco e Diana Barillari, ma e ponte ancje sui zovins. Intal cda e je stade di fat nomenade une zovine studentesse di Cjaprive, Rossella Dosso, che e à vint il concors leterari “Vôs de Basse” e e a puartât ae sô maturitât classiche une tesi che e valorize la lenghe furlane come element de identitât di Gurize e dal Friûl Orientâl jenfri Votcent e Nûfcent. La zovine, che e je ancje in consei comunâl tal so paîs, e à vint premis leteraris in cetancj concors: a Cormòns, Scluse, Gussola (Cremone), Roncadelle (Bressie) e Rodallo (Turin). Al talent si zonte une fuarte atenzion ae lenghe e culture furlane, che e à sburtât il president de Arlef Eros Cisilino a sielzile par rapresentâ il Friûl di Jevât e la part plui zovine dal public furlan. ❚
